太子站大叔徒手撬開幕門迫上車 網民翻出附例揭最高罰則

大叔太子站車頭位置徒手頂開幕門阻列車開出

事發於6月10日下午7時13分，太子站往荃灣方向月台車頭位置，當時列車車門已經關閉，準備正常開出。一名大叔疑因趕唔及登車，竟使出蠻力雙手頂住月台幕門，令幕門無法如常關閉。從目擊者上載嘅相片可見，大叔雙手撐開幕門嘅姿態相當誇張，完全無視周圍乘客目光，亦直接阻礙列車按時開出，令全車乘客被迫一齊”陪等”。目擊乘客將照片上傳至Threads，無奈表示荃灣綫班次極為頻密，根本無需要用九牛二虎之力去撬開幕門。

網民群起鬧爆大叔自私行為浪費全車人時間

事件曝光後，大批網民替全車乘客不值，紛紛鬧爆大叔行為極度自私。有人直斥”等下班車好難咩”，指出荃灣綫每隔2至3分鐘就有一班車，完全冇必要做出如此危險舉動。亦有網民諷刺大叔”司機位喺隔籬夠膽玩”，批評其膽大妄為。更有人指出呢類人未必真係趕時間，純粹係”我上唔到就唔畀你開車”嘅心態，結果搞到全車人一齊浪費時間，”而家佢咁仲嘥時間啦”。有網民更將香港同台北捷運比較，慨嘆香港”無時無刻都隨時有乘客阻礙車門關閉”。

根據港鐵附例干擾幕門最高可罰$2,000

不過大叔未必能夠全身而退。根據《港鐵附例》第9條”不當進入或離開列車”，任何人不得干擾鐵路處所內嘅任何門或閘，包括列車車門及月台幕門，違者最高可被罰款港幣2,000元。網民紛紛要求港鐵加強執法，認為正正因為每次強行頂門都”無後果”，先至令呢類自私行為不斷重演。有人更直言”頂完又會開返門畀佢上到，然後佢又無後果，啲人一定繼續頂”，促請港鐵認真處理，杜絕歪風。