Cafe低消$50！內地女3人叫$115冰品 怒掟$120走人公審店家反被KO

事主怒訴遭差別對待 質疑鄰座港女零消費齋坐

事主喺小紅書發文怒訴，指佢哋一行三人入店只係買咗一個$115嘅抹茶冰，但埋單時店員就話要「人均50」，即係要夾夾埋埋畀夠$150先可以走，或者要再買其他嘢。事主對此極度不滿，因為佢聲稱見到「對面兩個港女0消費」，只係用免費紙杯飲水，仲開晒電腦、平板喺度做功課。佢覺得自己受到差別對待，於是霸氣表示：「不好意思哈本人就是一位沒素質大陸遊客，不慣着」，最後掟低$120就走人，仲串嘴話「多送五元小費呢不客氣」。

網民洗版式反駁 指最低消費係香港常識

事件曝光後，帖文隨即喺網上瘋傳，但風向並無如事主所願，反而係一面倒被網民鬧爆！大批網民留言替店家不值，指出「最低消費」喺香港Cafe係好普遍嘅做法，通常餐牌或者落單時都會寫明，「歧視？我香港人喺香港一樣待遇。我都試過好樣衰咁睇唔到有低消……咁我咪道歉+主動提出補夠錢囉」。更有網民認出涉事Cafe，指「手機落單一定有寫最低消費」。對於事主指控鄰座港女「齋坐」，網民都群起反駁：「人哋可能食完俾人收左，但隔離檯既野關佢咩事」、「作爲港女從來未試過可以齋坐唔嗌嘢嘅待遇」。

疑似店員現身神還原 真相大白KO事主指控

正當大家食花生之際，一位自稱係該店職員嘅網民現身，將成件事嘅「另一版本」還原！佢澄清話，喺事主一行人落單嗰陣，已經提醒過佢哋有每人$50嘅低消，當時對方仲好正常咁話「ok我哋再睇下有咩嗌」。點知佢哋食完個冰都未補單，店員再上前詢問就開始嘈。至於事主口中「0消費」嘅港女，店員就解釋：「係學生妹，已經食完，我見佢哋要溫書所以幫佢哋收起咗個冰，唔存在零消費嘅問題」。呢個回應一出，即時KO咗事主嘅所有指控，成件事真相大白，佢嘅公審行動最終演變成大型炒車現場。