日本驚見「教仔」變互毆？人氣獼猴Panchi一秒反擊嚇呆長輩 網民爆笑：進入叛逆期

人氣猴Panchi一秒還手反擊長輩 驚人畫面全直擊

事發喺4月25日，從最新流出嘅片段所見，當時超萌嘅Panchi正同另一隻成年獼猴互動。起初氣氛融洽，點知長輩猴突然輕輕拍咗Panchi一下，似乎想「教仔」或者同佢玩。原以為Panchi會乖乖聽話，點知佢竟然反應極快，即時「起弶」秒速回敬長輩一巴！呢一下「還拖」快狠準，連對方都明顯呆咗一呆，似乎完全估唔到呢個細路哥咁大膽。而Panchi打完之後，又若無其事咁收手，成個過程真係令人睇到O晒嘴！

影片瘋傳網民群起爆笑 直指Panchi進入叛逆期學壞咗

事件曝光後，影片隨即喺各大社交平台洗版，大批網民睇完都忍唔住爆笑，紛紛留言話「連大猴都嚇親」、「呢下真係手快過腦，完全係本能反應！」、「Panchi學壞咗，開始識反擊啦！」更有網民笑稱Panchi已經正式進入「叛逆期」，愈大愈有性格，甚至有人抵死地提醒佢：「而家識還手，下次記得揀對象啦。」場面非常搞笑。

粉絲感慨見證曳仔成長史 溫馨解畫稱恃寵生嬌非反骨

不過，喺一片笑聲之中，亦有唔少網民為Panchi平反。有熟悉佢嘅粉絲就認為，Panchi平時太受長輩們嘅照顧同愛錫，先會「恃寵生嬌咁放肆」，加上佢仲係小朋友，「未識分輕重，只係本能反應啫」。亦有長期關注Panchi嘅網民感慨，話一路睇住佢由細個BB樣到而家，「開始有情緒、有脾氣，就好似睇住自己個仔長大一樣」，雖然行為調皮，但反而覺得呢份真實感更加可愛。