打包食物1小時細菌激增8倍！醫生警告：呢個溫度帶最危險 翻熱都冇用

醫生拆解細菌暴增恐怖時間線

台灣醫生王竣平近日發文，一針見血指出打包食物嘅致命盲點！佢警告，當食物離開熱源後，溫度一旦降至攝氏7度至60度之間，就會跌入恐怖嘅「危險溫度帶」。喺呢個溫度範圍，沙門氏桿菌等致病菌會瘋狂繁殖，大約每20分鐘數量就翻一倍！換言之，如果你將打包食物放喺室溫1至2個鐘先處理，細菌數量隨時暴增8到64倍，當每克食物嘅細菌量達到10萬以上，就足以引發腸胃炎，後果可大可小！

密封飯盒竟成完美細菌培養皿

事件引發大眾關注食物安全，醫生進一步拆解，唔少人以為將食物放入密封飯盒或膠袋就最穩陣，點知原來大錯特錯！佢形容呢啲密封容器根本係「完美細菌培養皿」，因為食物嘅濕氣被悶住，加上溫度緩慢下降，正正為細菌提供咗最理想嘅生長環境。特別係飯盒、炒菜、蛋類同豆製品呢啲高含水量嘅食物，風險指數更加係直線飆升，絕對係打包食物嘅頭號黑名單！

翻熱都冇用金黃葡萄球菌殺唔死

最令人心寒嘅係，以為食之前用微波爐「叮返熱」就安全？少年你太年輕了！醫生強調「再加熱不等於絕對安全」，好似金黃色葡萄球菌產生嘅毒素就極具耐熱性，就算你用高溫猛火翻熱都難以消除。而且食物中毒嘅潛伏期可以長達6至48小時，未必會即時出現症狀。醫生建議，打包食物若不即時食用，應先打開容器散熱，並於1小時內降溫分裝放入雪櫃，先可以將中毒風險減到最低！