港鐵打尖｜南亞漢拒排隊死撐！正義乘客圍攻 職員出動「VAR」結局勁無奈

南亞漢打尖斷正死口唔認職員到場都冇面俾

事發喺港鐵月台，從網上瘋傳嘅影片可以見到，兩名南亞裔男子喺排隊人龍中「喺後面衝咗上嚟」強行插隊。拍片者睇唔過眼出聲喝止，點知對方非但唔覺有問題，仲堅稱自己「正在排隊」，態度強硬。港鐵職員接報到場調解，並向在場其他乘客求證，一眾正義乘客即刻睇唔過眼，紛紛出聲指證：「係呀！佢哋打尖㗎！」還原真相。點知即使人證如山，兩名南亞漢依然拒絕合作，死都唔肯返去隊尾，搞到場面勁尷尬！

網民鬧爆影衰同鄉斥部份人恃惡橫行

事件曝光後，影片隨即喺各大社交群組洗版，大批網民替在場乘客不值，鬧爆該兩名南亞漢行為離譜，直斥「影衰其他好嘅南亞人」！有網民留言感嘆：「有啲南亞人好努力服務社區，但有另一班人不斷制(製)造破壞，影響佢地(哋)係(喺)香港的生活」。亦有網民一針見血指出問題所在，認為有啲人就係仗着本地人唔敢出聲，「一路靠惡來嚇人」。更有留言將問題升級，認為比起排隊問題，南亞假難民衍生的治安問題更值得當局正視。

職員出動VAR終極裁決結局竟係咁超無奈

面對兩名南亞漢嘅「堅守」，在場職員亦束手無策。由於對方堅持唔肯重新排隊，職員唯有召喚站務主任到場增援，更提出要好似球賽咁，出動「VAR」翻睇閉路電視錄影嚟做「終極裁決」。正當大家以為有好戲睇，可以見證公義得到伸張之際，列車啱啱好到站，拍片者為咗趕車，影片亦喺呢個最關鍵嘅時刻告終，留低一個極度無奈嘅結局，令一眾食花生的網民大感無癮，但亦充份反映出現實中好多時呢啲衝突都係不了了之嘅殘酷現實。