港男垃圾站蹂躪Chiikawa兔哥公仔當波踢　粉絲怒斥虐待動物

大埔垃圾站5港男當街踢爆兔哥公仔拍片炫耀

片段顯示事發地點為大埔山南路一處垃圾站對出的馬路，連同拍片者在內至少有5名男生在晚上時份，將烏薩奇公仔如足球般踢來踢去。現場不斷傳出嬉笑聲，拍片者更大聲叫囂「喂，呢邊呢邊」，另有聲音稱「到你」，完全無視兔哥公仔被蹂躪的慘況。更離譜的是，有人甚至走到馬路上「傳波」，罔顧交通安全。

兔哥粉絲群組洗版怒斥虐待動物行為不可取

片段曝光後，大批兔哥粉絲和網民群起圍剿片中男生。有粉絲心痛表示「有無諗過隻公仔感受」、「睇到好sad」、「公仔對我嚟講就好似有感情嘅動物咁，睇完呢條片真係好唔舒服」。更有人強力譴責「虐兔行為實在不可取」、「可以不愛，但不要傷害」。部分網民建議公仔主人切勿隨便「棄養」，「唔鍾意唔想要可以捐畀有需要人士，例如孤兒院或者紅十字會、救世軍等等」。

網民寸爆粉絲反應過激揶揄使唔使call漁農署

不過亦有留言指片中並無生命受傷害，批評個別人士反應過激。有網民反駁「其實有咩問題，玩下公仔就俾人話似會虐待動物嘅人？公仔咋喎大佬」、「如果佢踢嘅唔係Chiikawa，係一個普通嘅汽水罐，仲會唔會有咁多人話佢哋？」，更揶揄「使唔使call漁農署？」。但有意見認為即使玩樂都要看地點，「玩還玩，唔好喺馬路到玩」、「做埋啲傻嘢已經夠低能，仲要po上嚟畀全世界人知」。