九巴女乘客攜巨型膠袋強登車｜職員爆「講咗三班車」 乘客1招令她下車

女乘客三度闖關被拒 職員爆「講咗你半個鐘」

事發於1月29日下午6時20分，一輛開往上水的九巴978號線停在西隧轉車站時，穿淺藍色外套的女乘客攜帶兩個大型黑色膠袋上車。九巴職員上車制止，表示「講咗唔俾你上車㗎，咁大……我同你講咗好多次」，更透露她已在上一班巴士被拒絕登車。職員苦笑向其他乘客解釋「我真係講咗好多次，佢件嘢過大」、「講咗三班車㗎啦」，顯示該女乘客已三度嘗試強行登車。車長亦明確表態「一係就唔好開啦」，如果她堅持不下車就不會開車。

女乘客堅持「我打了卡」拒下車 車長威脅不開車

面對職員的要求，女乘客多次揮動手中的八達通卡，強調「我打了卡（拍了八達通），我不落車，我打了卡」。她認為車廂內「又不是好多人」，質疑為何不能上車，更表示「我比這行李箱還重些，等了半個鐘，我又沒有犯錯誤」。職員耐心解釋「我同你講咗好多次㗎啦，我講咗你半個鐘㗎」，並威脅「你係咪唔落車，唔落車我打畀督察」。車長則堅持立場，表明「我唔開㗎，講明先呀」，批評她阻礙全車乘客「呢度百幾二百人係度呀」。

全車乘客鼓譟促下車 怒斥「呢架唔係貨車」

隨著僵持時間延長，車上其他乘客開始表達不滿，紛紛要求女乘客下車。乘客們高聲喊話「唔該落車啦唔該」、「邊有人好似你咁拎咁多嘢」、「你害咗我哋呀，咁自私」、「咁多人喺度等你一個人呀？你自己睇下後面幾多人」。一名年輕女乘客更直接反駁「人哋都唔畀你上車，你打咩卡啫，你夾硬嚟都冇用㗎啦」，有乘客和議「呢架巴士嚟㗎，呢架唔係貨車」。面對眾人指責，女乘客不忿還擊，堅持「又不是好多人、好多人唄我不上啦」。

乘客遞硬幣「退款」化解僵局 女乘客終願下車

僵持不下之際，女乘客要求退款才願意下車，「你退我錢我走」。職員表示現場無法退款，需致電九巴熱線安排，但女乘客堅持要即時退款。最終一名坐在旁邊的女乘客主動遞上硬幣，表示「你攞去呀」幫忙「退款」，女乘客即時伸手接下硬幣，彎腰拿起物品準備下車。職員指示她從中門下車，過程中雙方疑有輕微觸碰。女乘客下車後，她攜帶的兩個大型膠袋終於「曝光」，其中一個膠袋體積極大，可能裝得下一個成年人，另外還有一個黑色袋及一個粉紅色大袋。

網民大讚職員處理得當 怒斥女乘客自私行為

事件影片在網上瘋傳後，網民紛紛大讚九巴職員和車長的專業處理，認為該名女乘客「阻住個地球轉」。許多網民特別讚賞最後出手相助的乘客，留言「阿姐好嘢，俾2蚊趕走刁婦」、「睇咁耐原來就為嗰2蚊」、「佢真係好意思拎咗呀姐嗰$2」。有網民表示「都要讚下最後嗰個小姐，雖然兩蚊唔多，但都幫到成車人啦！呢個阿婆以為個個趕時間，個司機就會就範開車，點知個個都企硬！呢啲人仲衰過唔扣安全帶！罰佢$5,000差唔多」。根據九巴乘客須知，乘客嚴禁攜帶總體積超過十分之一立方米、總重量超逾5公斤或含危險性或厭惡性之物件上車。