機場MMA！大媽拒付託運費發爛渣 女兒突襲起飛腳 2孫女全程目擊嚇呆

一家五口無買行李額度大媽拒補錢當場發爛渣

事發喺昆明長水國際機場，涉事嘅一家五口買咗春秋航空公司嘅平價機票，但機票本身並無包免費行李託運額。地勤人員發現佢哋嘅行李尺寸同重量都超出標準，於是要求佢哋補返相關費用。點知帶住行李篋嘅大媽一聽到要補錢就即刻變臉，喺度大吵大鬧，仲大聲鬧職員：「憑什麼要補錢」、「你們就是故意要坑我們」，又話自己唔知道有呢個規定，企圖蒙混過關。

影片瘋傳網民群起圍剿鬧爆一家人教壞細路

事件影片曝光後，即刻喺網上被瘋傳，大批網民睇到眼火爆，群起圍剿呢家人嘅惡劣行為！唔少人鬧爆大媽一家行為無理兼野蠻，「無錢就唔好學人搭飛機啦」、「自己買平機票唔睇條款，仲好意思發爛渣？」更有網民替地勤人員不值，認為航空公司應該將佢哋列入黑名單。最多人關注嘅係同行嘅兩名小朋友，大呻：「喺個孫面前咁樣，真係教壞細路」、「完全係最差嘅身教，第時啲細路有樣學樣就慘！」

女兒飛腳助攻超展開大媽突插水式暈倒嚇親孫女

眼見理論唔成，大媽竟然想夾硬衝去登機閘口，地勤人員即刻上前阻止，雙方爆發肢體衝突。點知同行嘅女兒唔單止無勸交，仲突然起飛腳「助攻」踢向職員，場面極度混亂！最令人O嘴嘅係，大媽喺衝突過後，竟然上演一幕「插水」戲碼，突然成個人瞓喺地下不斷掙扎，扮晒痛苦之後仲疑似詐暈. 全程目擊嘅兩名孫女當場嚇到呆咗，完全唔知發生咩事，場面令人心酸。