港鐵站上演爆笑一幕！港爸扶手梯狂跳3次執手機 結局神展開網民睇到O嘴

港爸逆行狂跳3次上演執機血淚史

事發喺港鐵香港站，從網民分享嘅影片可見，一位身穿深藍色上衣嘅港爸，同一名年幼兒子正使用平面扶手電梯。點知手機意外跌入電梯同牆壁之間嘅狹窄縫隙，港爸見狀即刻將身上嘅斜揹袋除低，交俾個仔睇住，然後就開始佢嘅「執機大作戰」！佢逆住電梯前進方向，行返去手機掉落嘅位置，然後連續3次奮力跳起再俯身，想伸手將手機撈返上嚟。可惜每次都係掂到部機，就因為電梯移動而失手，場面既狼狽又搞笑，連港爸自己都忍唔住無奈苦笑。

網民瘋傳恥笑似夾公仔機但力撐係好爸爸

影片曝光後，隨即在網上瘋傳，大批網民睇到爆笑，紛紛留言「好似玩緊夾公仔機咁」、「執完電話減咗900卡路里」、「我睇咗1個鐘，佢仲未執到」。不過，亦有大批網民力撐港爸，認為佢係一位絕世好爸爸，「唔覺得佢X，他係1個好爸爸，個仔跌咗部電話第一時間冇鬧個仔，而係冷靜咁除咗個袋，盡佢能力去執返部電話」、「其實以佢個體型再加埋個努力，都算係咁」。

結局驚人神展開路人一招輕鬆KO

正當大家以為港爸要同部手機「有緣無份」之際，有聲稱目擊事件嘅網民留言大爆結局，原來完全係神展開！該網民指：「之後後邊有個男仔好smooth咁，直接伸長隻手沿住條電梯就接得返部電話」。呢個驚人結局令一眾網民O嘴，估唔到港爸出盡九牛二虎之力都搞唔掂嘅難題，竟然被路人輕描淡寫一招KO，果然高手在民間！亦有網民建議，其實最直接嘅方法應該係通知職員協助，咁就唔使搞到自己身水身汗啦！