日本熱到痴線！官方正式為40°C高溫定名 20萬人票選「呢個名」網民：聽到都驚！

氣溫衝破40度官方認證危險級別

去開日本嘅朋友都知，當地氣象廳對氣溫分級好講究，攝氏25度以上叫「夏日」、30度以上係「真夏日」、35度以上就係「猛暑日」。但隨住近年熱浪愈嚟愈癲，40度以上嘅極端高溫已經唔再係罕見事，現有嘅名詞根本唔夠用！有見及此，日本氣象廳決定要為呢種「地獄級高溫」正名，目的就係要用一個新詞語，大大力咁提醒所有民眾：當你聽到呢個字，就代表危險殺到埋身，唔係講玩！

20萬人瘋狂投票結果揭曉拋離亞軍足足3倍

今次命名唔係政府部門圍內決定就算，而係搞咗個全國公開投票，畀所有民眾一齊參與！總共有13個候選名單，包括「超猛暑日」、「嚴暑日」、「激暑日」等等，競爭相當激烈。事件曝光後，即刻引起全國熱議，最終吸引咗高達20.3萬人瘋狂投票！結果喺4月18日正式揭曉，由「酷暑日」以無敵姿態高票當選，得票數更加係第二名「超猛暑日」嘅3倍以上，可見呢個名得到壓倒性支持，完全反映咗民眾對極端高溫嘅憂慮！

官方正式拍板提醒民眾做好應對準備

隨住投票結果出爐，日本氣象廳亦正式拍板，宣佈以後只要最高氣溫超過40度，就會被稱為「酷暑日」。呢個係繼2007年設立「猛暑日」之後，再次新增嘅高溫分級。官方負責人表明，希望大家一聽到「酷暑日」呢三個字，就會即刻意識到呢係一種需要採取緊急對策嘅危險天氣. 各位準備去日本旅行嘅朋友仔，真係要打醒十二分精神，見到天氣預報出現呢個新名詞，就記得要做好萬全嘅消暑防曬準備喇！