公屋裝修完工開門即崩潰 廚廁地磚慘變「斑點狗」

裝修完工廚廁地磚驚現滿地白色污漬

事主早前在Facebook群組「公屋討論區」上載短片及相片發帖，可見廚房及廁所地磚表面散落大量白色油漆痕跡，情況相當嚴重。事主大呻師傅施工期間完全無做好保護措施，導致油漆四濺沾污地面，整個地磚外觀慘不忍睹。事主透露廳房因後期才鋪地板所以暫時睇唔到損傷，但廚廁範圍已經「斑點狗」上身，無奈發帖問「仲有無得搞」，希望有過來人分享清潔方法。

網民群起鬧爆裝修師傅施工零保護

事件曝光後，大批網民替事主不值，紛紛狠批涉事裝修師傅手工差劣。有人直斥師傅施工期間竟然無做任何保護工序，質問事主「點解會收貨？」、「唔睇晒先俾尾數？」，認為正常師傅完工後理應自行清理乾淨。更有網民估計事主「搵錯人」，懷疑對方根本並非行內人，只因報價平到難以抗拒才中伏. 大批留言建議事主「搵返裝修佬」追究責任，甚至直接扣減尾數迫對方善後。

熱心網民教路五金舖買呢樣嘢即刻搞掂

不過若師傅已經無法追究，網民亦有後路提供。最多人推薦的「清潔神物」是到五金舖購買天拿水或松節水，直接濕抹即可溶解油漆痕跡。有網民詳細教路：先用天拿水抹一次，隔一小時再用綠水抹多次等乾便可. 亦有人建議買把漆剷，可以刮走瓦面上較頑固的油漆殘留物。有請過清潔姐姐的網民更分享經驗，指松節水效果好過天拿水。不過有人特別提醒事主「唔好亂試」，最穩陣做法是直接去五金舖向店員求教，對方會根據實際情況提供最合適的清潔方案。