電影
電影

農曆年好節目! 7套新春檔期電影!PIXAR、MARVEL乜都有!

熱話

廣告

啱啱先過晒聖誕、除夕呢d大日子,話咁快又就嚟到農曆新年喇,記者我每年除咗周圍拜年(同返工)之外,都會入戲院睇吓戲,今次就介紹返7套新春檔期上映嘅電影,揀定想睇邊套到時記得早d買飛喇~

1.花鼠明星俱樂部:開心大唱遊(上映日期:2月4日)

以往幾集都好有保證,3隻識唱歌跳舞嘅花鼠仔每次都帶好多歡樂畀大家,今次三隻小鮮肉花鼠花仔、亞矇、亞肥漸漸長大,當佢哋知道主人戴夫要去邁阿密,準備向女友求婚時,竟然以為戴夫會順便拋棄佢哋,密謀計劃搶婚大反擊!

2.恐龍大時代(上映日期:2月4日)

繼《玩轉腦朋友》之後,PIXAR帶你走入恐龍嘅世界,假如恐龍冇絕種,或者呢個就係我哋嘅故事。弱小嘅人類成為咗恐龍嘅寵物,但係因為一次意外,令到主角同恐龍成為好朋友,善良可以改變世界。PIXAR平時嘅電影都出名係畀大人睇,睇完預告片,記者估計今次都係講成長,但係可能會加入些少環保元素,不過都係估估吓,真正意思都要到時入場睇完先知。

3.死侍: 不死現身(上映日期:2月9日)

MARVEL系列電影又有新角色登場喇,死侍係MARVEL系列入面唯一一個知道自己係漫畫人物嘅角色,所以佢喺漫畫入面經常都會同讀者講嘢,今次拍成電影之後,記者好期待佢同觀眾嘅互動,聽講佢好似仲會干預字幕點樣寫佢添!不過死侍亦都係咁多知MARVEL超級英雄入面講嘢最粗俗嘅一個,因為根據佢所講,佢根本就唔想做英雄,只係為咗搶返女朋友先去打壞人。

4. 美人魚(上映日期:2月8日)

相信9成香港人都係睇星爺嘅戲長大,繼影評麻麻嘅《西遊.降魔篇》之後,星爺再次執導,不過今次《美人魚》嘅預告片都幾好笑,特別係嗰幾幅美人魚圖,記者都忍唔住笑咗。但係星爺嘅片始終都係廣東話先夠親切夠好笑,聽住普通話版,硬係覺得有d唔多慣囉。

5.西遊記之孫悟空三打白骨精(上映日期:2月4日)

老實講,西遊記真係由細睇到大,大大話話都睇過10個版本,雖然今次睇完預告片都唔係好知佢講咩,不過劇情估計都係咁上下,但係今次反而想入場睇吓CG技術,到底點樣可以令到城城唔似城城,謙謙唔似謙謙呢?唯一似樣d嘅,係得師傅同埋觀音大士咋。

6. 卡露的情人(上映日期:2月11日)

呢一類比較小眾嘅電影好少可以搶到新春檔期上映,所以記者都決定支持一下。故事講述一個後生女同埋一個貴婦相愛嘅故事,但係喺世俗眼光下,無論性別、身份地位差異都令佢哋不被看好,到底佢哋可唔可以衝破一切抓緊摯愛?除咗故事之外,兩位主角本身亦好吸引,分別係金像影后姬蒂白蘭芝同埋出爐康城影后朗妮瑪娜。

7. 賭城風雲 III(上映日期:2月4日)

賭_系列似乎長做長有,連賭城風雲都拍到第3集,今次有齊周潤發、劉德華、張學友、張家輝,仲有PSY添!早排喺MAMA頒獎典禮睇到發哥同PSY一齊跳騎馬舞,唔知喺戲入面佢哋又會有咩互動呢?預告片睇落就好似幾好笑,不過呢位導演嘅作品,記者就興趣不大喇。


延伸閱讀
全城熱話!電影《十年 》反映的5個香港現實
Netflix美劇神網登陸香港!免費任睇一個月懶人包
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8

Android:https://play.google.com/store/apps/details?id=com.weekendhk.newsstand2&hl=zh_HK
新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

最新吃喝玩樂資訊