學童攝車罅過馬路險被撞！醒目司機一個舉動救2條人命 網民：幫唔到好多次

學童攝車罅過馬路險被撞！
醒目司機一個舉動救2條人命 網民：幫唔到好多次

該影片被上傳於「車cam L」（香港群組），事發喺荃灣荃景圍路段，片主尾隨一架俗稱「街斗」嘅大型貨車至燈口停車，前面可以見到一架校巴剛剛駛離，兩位著住校服嘅小朋友左望右望之後決定係兩架車之間攝出去過馬路。樓主應該係留意到一架電單車由右邊逆線爬頭，將會撞到兩位學童，在千鈞一髮之際用力響咹提醒，兩位先係嚇一嚇然後即刻走返上行人路，而差啲撞到人嘅電單車就向行人路方向望咗一眼繼續前行。

其實夾喺兩架車中間，車又見你唔到，你又見唔到車，喺呢個位過馬路真係好危險，特別係條片入面佢哋企喺一架5噸嘅街斗貨車後面本身就已經好多死角盲點，如果有咩事架貨車要退後分分鐘仲危險過比電單車撞到！所以好多網民讚賞樓主救人嘅行為之餘，亦都指出其實行前少少就有斑馬線，喺呢個位過馬路真係壞習慣，而今次亦都唔係單一事件，有好多其他人甚至老人家都鍾意喺呢個位過！

雖然亂過馬路係唔啱，但同樣作為道路使用者，電單車司機亦都有不是之處。喺片入邊可以見到條路都幾窄，再加上大型貨車喺前面，電單車要爬頭其實已經入咗隔離線，如果對面有車迎面而來佢根本冇位閃避。有網民就指出電單車司機其實經常燈位爬頭其實好易出事，其實橫掂都係要等，有少少耐性同小心至上，其實好多意外都可以避免。