全港8間必食米線小店推介！米線關注組大推：金西南/川品/龍川/雲川/天星
全港8間必食米線小店推介！
1.金西南米線
金西南米線是旺角、銅鑼灣人氣米線店，亦是多年來米線關注組熱捧的名店。必試自家秘製酸辣湯底 ，以多種香料熬製，內有秘製辣肉碎、韭菜、酸菜等配菜，酸香有層次，辣度順喉，十分開胃。米線方面，咬下去的口感彈牙且有煙韌感，掛湯能力相當不錯，每一口都能品嚐到湯底酸辣滋味。此外，金西南米線還提供超過30款配料，當中最出色的配料是金獎腩肉，經長時間炆煮，軟腍入味，油香濃郁而不膩，其他人氣配料仲有牛肝菌(限量)、滷水豬肚、豬大腸等。金西南米線還有多道冷盤小食，如麻辣手撕雞、手拍青瓜、藤椒魚皮等；另外炸物也有香口的皮蛋炸豆卜、雞軟骨等供顧客選擇。但最估不到竟然仲有甜品供應，人氣必點金黃香脆鴛鴦炸饅頭、以及爆漿紅糖糍粑，一次過滿足一眾米線甜品控！
金西南米線
門市地址：
📍旺角花園街3-5號鴻威大廈2座地下9號舖
📍銅鑼灣登龍街41-51號金龍大廈地下D號舖
2.川品雲南米線
無論是米線關注組抑或是Threads友都力推的米線小店，店主曾遠赴雲南跟師傅學藝，每一碗米線都用明火逐碗炮製。招牌酸麻辣湯底鹹中帶有微酸，濃郁惹味，配合滑溜微彈的粗身米線，掛湯力一流！店家最出名是招牌生炸豬頸肉，炸到外皮金黃微脆，肉質juicy，絕對係每檯必點嘅名物！
川品雲南米線
門市地址：
📍大角咀大角咀道38號新九龍廣場地下023-026號舖
📍北角電氣道233號城市花園地下G53號舖
📍荃灣荃華街16號荃薈地下A101B號舖
📍新蒲崗康強街17A號地舖
3.龍川雲南米線
呢間最初隱藏喺太子塘尾道嘅街坊小店，憑住高質湯底及配料，喺關注組一炮而紅，更先後在元朗及灣仔開分店。店家最出名是獨門調配酸麻辣湯底，湯頭酸度與麻味嘅比例恰到好處，先品嚐到醇厚的湯頭及微酸，隨之而來有強烈辛辣後勁，麻香又辣。而近期店主更專程到泰國學師，推出全新泰式冬蔭功湯底，做到非常貼近泰國當地街頭風味，酸辣開胃，香氣十足，配埋幼身煙韌又掛湯嘅米線，簡直絕配！必食小食大推招牌炸䱽魚、豬頸肉、孜然魷魚鬚、墨魚春卷，選擇超豐富！
龍川雲南米線
門市地址：
📍太子塘尾道186號地下
📍元朗鳳攸南街9號好順利大廈地下14號舖
📍灣仔軒尼詩道153號地下
4.唯一雲貴川風味
荃灣區30年老字號人氣米線店，深受街坊熟客推介。店家主打酸辣雲南米線，湯底混合川貴辣風味，以大量辣椒熬成，偏重口味，辣度循序漸進，味道醇厚而極有深度。配料方面最多人推介香滷腩肉，肥瘦比例剛好，滷得極之入味；秘製炸醬鹹香惹味，師傅畀得毫不手軟，簡直係爆量！
唯一雲貴川風味
門市地址：
📍荃灣四陂坊14號地舖
5.新貴香園
新貴香園是荃灣最強米線店之一，每逢食飯時間都排長龍。而店家最出名是特濃沙嗲湯底，色澤微黃濃郁，有滿滿花生碎粒，入口鹹香帶甜，質感稠密好掛湯；另外供應雲南酸辣、酸麻辣等惹味湯底。炸物都好出色，大推炸豬頸肉、炸豬扒、炸茄子，記得要留個肚試齊佢！
新貴香園
門市地址：
📍荃灣西樓角路202-216號昌安大廈荃昌中心1樓53-54號舖
📍荃灣享和街51號都城大樓地下E號舖
6.雲川米線．紅薯粉
講到新界西嘅米線霸主，一定有雲川米線．紅薯粉這個名字！呢間由屯門發迹嘅人氣神店，近年更將版圖擴展至元朗、天水圍，甚至進軍觀塘！雲川共有5款特色湯底，有用大量鮮魚每日熬煮的招牌鮮魚湯底、酸麻金湯底、酸辣湯等，記得跟配鎮店之寶炭燒豬頸肉，外皮微焦脆，肉質嫩滑！
雲川米線．紅薯粉
門市地址：
7.天星雲南米線
天星雲南米線是米線關注組熱捧店，無論任何時間都大排長龍。當中最推介是酸麻辣湯底，集酸爽及麻辣於一身，配上腩肉、豬軟骨、鴨血等配料，索汁惹味。而配料方面，有超過30款選擇，其中就以香脆煎䱽魚、酥香豬頸肉、煙韌滑嫩鴨血、軟嫩豬軟骨最受歡迎，幾乎每枱必點。
天星雲南米線
門市地址：
📍旺角砵蘭街136號地舖
8.富金軒雲南米線
富金軒雲南米線（平記富金軒雲南米線）最初是佐敦官涌街市熟食中心的人氣小店，憑着馳名黃酒雞米線打響名堂，後來更搬入佐敦地舖重開，大大改善環境衛生。店家的黃酒雞湯米線以40斤豬骨、雞殼等熬足一日，再加入多種藥材包括紅棗、薑、杞子和黃酒用鐵鑊炒製，湯頭鮮甜暖胃，帶酒香味，啖啖回甘。
富金軒雲南米線
門市地址：
📍佐敦廟街259A號地下E號舖
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
