泰菜
泰菜

【自助餐放蛇起底組】高分!亞洲50最佳餐廳 $238泰式半Buffet

熱話

廣告

平時見我哋放蛇專員係咁食自助餐,你哋係咪心郁郁想食埋一份呢?今次我哋請到兩位《新假期》民間食神 (其實係本刊忠實讀者) 同我哋一齊放蛇,目標係亞洲50最佳餐廳嘅泰菜餐廳 Issaya!呢間位於銅鑼灣的餐廳,平日叫個 Main course 已經已要$2xx,最近竟然全球首次推出$238起嘅半自助餐,價錢包一個主菜,前菜和甜品可以無限任食,食足3個鐘,究竟質素如何?立即交俾食神品評下!去片!

頭盤甜品任食 主菜6選1

半自助午餐由12點開始,可以慢慢歎到3點,頭盤同甜品可以出去自助餐枱任拎,而主菜就6選1,價錢由$238-$350,視乎主菜而定。一坐低,店員就送咗一杯餐前飲品,可以揀荔枝烏龍茶或芒果黑茶,食神試咗荔枝烏龍茶,好夠荔枝味,不過就甜咗少少,最好再茶入面嘅冰融咗少少,溝淡少少飲會好啲。

泰菜 Q5
送一杯餐前飲品,可以揀荔枝烏龍茶或芒果黑茶。
泰菜 Q6
食神黎先生話荔枝烏龍茶甜咗啲,等啲冰融咗少少,淡味啲會更好。

首先睇下頭盤,頭盤好多都係沙律,不過款式都幾多,唔係一味食菜,有香蕉花伴棕櫚芯沙律、青木瓜海鮮沙律同泰式酸汁三文魚沙律,仲有香辣醋汁牛柳、脆香辣汁海蝦,另外有自家製泰式海鮮湯同磨菇湯。

泰菜 Q23
Open kitchen變咗做自助餐枱,頭盤甜品都可以係出面任拎。
泰菜 Q9
食神林小姐就試咗香蕉花伴棕櫚芯沙律,佢就話口感有啲硬,而且柚子有啲苦,唔太啱食!
泰菜 Q10
嚟個close up,柚子都落咗好多喎!
泰菜 Q3
青木瓜海鮮沙律好多蝦!如果你想食辣啲嘅可以問店員拎辣椒。
泰菜 Q0
脆香辣汁海蝦~食神黎先生話個蝦有啲乾,記住要蘸多啲汁。
泰菜 Q1
泰式酸汁三文魚沙律,食落好似泰式生蝦Style,三文魚好新鮮,勁fresh,一定要食!
泰菜 Q2
香辣醋汁牛柳~食神黎先生話牛柳加青瓜好fresh,都唔錯!
泰菜 Q4
自家製泰式磨菇湯食神們都話唔夠熱,但真係好足料,同埋味道可以再重手啲,濃味少少就好啦
泰菜 Q44
海鮮湯都一樣咁足料。
泰菜 Q7
前菜大致上都唔錯,有少少瑕疵,但整體食神都好滿意嘅。

6選1主菜 帶子/牛面頰肉有驚喜

埋單幾錢呢?其實就睇主菜而定嘅,咁6選1主菜有咩食呢?分別有3個價錢選擇嘅,$238有蜜汁香煎帶子配豬腩肉/泰南黃咖喱雞/黃咖喱雜菜鍋,$288有慢煮澳洲燉牛面頰肉/胡椒香草大虎蝦,$350有椰香蒸焗龍蝦,而每一客主菜都跟一份清邁蘑菇五穀飯,夠埋飽肚啦。

泰菜 Q14
食神林小姐試咗蜜汁香煎帶子配豬腩肉,佢大讚帶子煎得好香,豬腩肉雖然有啲少,但非常濃味!兩者非常夾!
泰菜 Q11
小編試嘅係慢煮澳洲燉牛面頰肉,食落肉質好鬆軟,雖然略欠牛味,但醬汁搭救,好重椰醬味!
泰菜 Q12
食神黎先生試咗椰香蒸焗龍蝦,佢話賣相一流,食落好鮮!
泰菜 Q13
調味鹹咗少少,但龍蝦入面有啲椰菜,記住連埋一齊食,balance返個味都唔錯.
泰菜 Q15
清邁蘑菇五穀飯非常足料,多豆多菇,口感豐富。

6款甜品任食 食神好評俾高分

甜品有6款,有煙燻椰青芝士蛋糕、茉莉花奶凍、桑莓朱古力軟芝士蛋糕、桑梅杏仁蛋糕、泰式馬卡龍同自家製雪糕,另外仲有4款水果。

泰式馬卡龍每日有一款味,放蛇個日係泰式奶茶味!勁罕見!食神黎先生話好夠茶味,唔太甜,男仔食都唔覺太甜!可以啪多幾粒!桑莓朱古力軟芝士蛋糕造型好得意!好似O緊咀嘅甲蟲,食落呢,味道酸酸甜甜,配埋曲奇餅底唔太膩。林小姐就試咗煙燻椰青芝士蛋糕,佢覺得芝士好濃味,但同個曲奇餅唔係好夾,而茉莉花奶凍第一啖個味道有啲怪,但食多幾啖食真啲又幾清新,同埋好滑!自家製雪糕當日係腰果味,有脆米、椰絲等配料自己加,食落腰果味好濃郁,夠creamy!

泰菜 Q24
甜品就算夾晒都有refill~
泰菜 Q16
一日一款味道輪流登場,有鹹蛋、香蕉、桑莓等味道,放蛇個日係泰式奶茶味,少見!
泰菜 Q22
泰式奶茶味馬卡龍食落好夠茶味,唔太甜,正!
泰菜 Q17
桑莓朱古力軟芝士蛋糕似隻甲蟲,食落酸酸甜甜,同埋曲奇餅底唔太膩。
泰菜 Q21
「茉莉花奶凍好滑,第一啖個味道有啲怪,但食多幾啖食又幾清新!」
泰菜 Q20
自家製雪糕係腰果味,腰果味勁濃郁,而且好creamy!
泰菜 Q18
仲有4款水果!

總結:

即係咁,呢間亞洲50最佳餐廳平時剩食個主菜都$2xx啦,今次$238半自助午餐真係賣大包囉,3月仲要有額外85折優惠,好抵,真心好抵!!!選擇呢,如果頭盤甜品再多啲選擇我會更滿意,食落呢,八成嘢食都高水準嘅。服務好貼心,店員有問必答,我哋食神話好凍又肯幫佢熄冷氣同俾披肩佢,加分!而且環境實在太舒服了,闊落得嚟又多梳化位,而且用晒落地玻璃窗,好開揚!所以今次小編同食神都俾極高分!復活節未諗去邊食可以諗諗!

小編總分:8.5/10

食神黎先生: 「二個字,無得輸!我俾9分!」

食神林小姐:「總括嚟講樣樣都幾好,自己俾錢都會返嚟食,我俾9分!」

泰菜 Q26
環境好大好舒服,有好多梳化位,如果我日日有3粒鐘可以過嚟hea就好啦!

IssayaSiamese Club Hong Kong

地址:銅鑼灣登龍街1號金朝陽中心二期25樓全層(顯示地圖)
電話:2154 3048
半自助午餐供應時間: 星期一至日 12nn-3pm
收費: $238-$350 (視乎主菜選擇而定)
用餐時間:3小時
備註:收加一,三月份可享八五折優惠

延伸閱讀:

【自助餐放蛇起底組】Asahi+梅酒任飲! $188周末蒸鍋刺身放題

【自助餐放蛇起底組】MK日式放題 3小時有鐵板燒食

最新吃喝玩樂資訊