私家車夾硬切線向警車挑機 結局超悲慘！原來罰則超驚人 網民：傻人發現案
廣告
香港揸車真係要打醒十二分精神，特別係當好多人拎完個車牌之後將所有交通規例拋諸腦後嘅時候，自己安全真係需要自己負責。近日網上流傳一條影片就引起網民熱烈討論，片中一架私家車打燈轉線，但偏偏就要揀cut喺警車前面，搞到比阿sir截停，令網民驚嘆香港傻人真係多，更有好心人教導各位安全切線嘅指引！
網民：傻人發現案！私家車「七節棍」轉線向警車挑機？
呢條片被上傳喺「車cam L（香港群組）」，影片一開始就見到一架黑色車於右線打燈準備轉入中線，而位於中線嘅片主前面就有一架警車交通部警車。片中可見片主已經慢駛準備讓位俾黑色私家車，但就係關鍵一刻私家車司機竟然篤油向前，而警車一直都冇讓佢入嘅意思，但見不遠處右線停咗一架救護車，私家車唯有喺關鍵時刻由警車前面入，警車唯有煞掣停車，並隨即Fing燈響號尾隨私家車，仲聽到片主講「咁多車唔閘係要閘個交通部嘅！」
有部份網民就覺得阿Sir好小氣，右線有緊急車停咗，喺嗰度等一世都入唔到線，讓下人入其實無乜所謂。但大部份嘅聲音都係覺得簡直不可思議，私家車司機一定係身痕，後面咁多位唔入係都要喺前面夾硬入，好明顯係壞習慣，更何況即是警車讓你，行喺佢前面點都係冇着數，不如跟佢尾好過。正所謂讓你係人情唔讓你係道理，司機大佬咁睇唔開，真係想幫你都幫唔到。
網民教路如何安全切線
而一部份眼利網民更特別提到，其實司機切線嗰個位係屬於燈位前，可以見到車路分界線線段比較長，屬於警告線，因為通常有7段線段，所以又俗稱「七節棍」，用作警示駕駛者該段路比較危險，必須格外小心，喺另一條行車線完全冇車嘅情況下先至可以安全切線，否則有機會被控告危險駕駛，即扣10分！即使該路段並非「七節棍」，切線都必須要喺唔影響其他駕駛者嘅情況之下，如果令到其他車輛煞停或者閃避已經可以構成不小心駕駛，各位司機記住咪貪一時之快喇！
發生什麼事？
近日一名私家車司機在馬路上強硬切線，向後方的警車挑機，結果下秒即被警方截停…詳情
網民點睇？
網民直言該位私家車司機「好玩唔玩」，竟然選擇向警方挑機…詳情
圖片來源：車cam L（香港群組）, 逃學威龍2電影截圖
