Camping Van遊新西蘭 慢遊世界8大奇觀@Travel佳

香港嘅夏天又濕又熱，Travel佳每年暑假都會選擇去南半球避暑，熟嘅朋友都知道，阿佳最鍾意玩自駕遊，去到邊、玩到邊、食到邊，夠晒方便。

今年阿佳就揀咗去新西蘭嘅南島玩自駕遊，坐新西蘭航空11個鐘就到奧克蘭，再轉2個鐘機就去到Queenstown。為咗可以慢遊呢個寧靜嘅島國，欣賞不同嘅仙景， 梗係租架Camping van代步，連酒店錢都慳埋！

Camping Van 適應冇難度

大家可能問阿佳，Camping Van咁大架會唔會好難揸㗎？其實阿佳喺香港都係揸開hatchback仔，去到當地轉揸大車，當然亦要少少時間適應。不過，新西蘭同香港一樣都係右軚， 當地馬路又闊又較香港少車，加上今次喺Travel Expert連package租嘅係自動波車，只要出入路口同爬頭時多少少預算，好快就可以適應。

阿佳同3對couples一齊share，每人連機票計落都係7千幾，3張大床夠晒瞓，去完超市入貨，夜晚喺parking site仲可以用Wanaka出產嘅白酒煮當地最靚嘅藍青口，真心要講一句 “Life is truly amazing”。

玩盡全球最激X-game

講番今次嘅行程，我哋主要都係留喺南島嘅 Queenstown一帶活動，呢個每年冬天都俾雪山同冰川包圍嘅小鎮看似寧靜，但有World’s Capital of Adventure之稱，世界上有唔少嘅X-game，例如Bungee Jump、Canyon Swing、Heli-rafting都係源自呢度，而市郊更有4大滑雪場，鍾意滑雪嘅阿佳當然唔會錯過機會。

體驗快艇360自轉

我已經第3次嚟呢度，每一次都會去 Shotover Canyon體驗全球最快嘅快艇之旅Shotover Jet，船長會喺峽谷中間以80km/h嘅高速穿穿插插，喺即將撞落去嘅時候急轉向，仲會喺淺灘上玩360度自轉，雖然被冰凍嘅河水淋到濕晒，但經歷真係畢生難忘。

自駕魔戒拍攝仙景
除咗X-game，動靜皆宜嘅阿佳最鍾意就係睇靚景，距離Queenstown約280公里嘅 Milford Sound就絕對不能錯過。呢度素有世界8大奇觀之稱，逾千米嘅雪山同冰川水融化到峽谷中間，形成森林、峽谷、湖泊、冰川同雪山嘅奇觀，而呢度亦係拍攝 《魔戒》電影系列嘅取景地，上次阿佳參加直升機遊未能話停就停，但今次揸住Camping Van深入Milford Sound，3小時嘅車程揸足6個鐘，再坐埋遊船，影到夠本先返去Queenstown。
板車甩尾體驗
遊Queenstown，另一個絕對唔可以錯過嘅景點就係坐 Skyline Gondola吊車登上Skyline Queenstown嘅山上，除咗可以喺山頂餐廳食住本地著名嘅羊架欣賞雪山同湖景之外，更可以一試全長800米嘅Luge Ride，駕駛板車高速挑戰多個「髮夾彎」，如果技術不足，隨時都會「甩尾」一場嚟到新西蘭，當然亦要去山腳嘅Kiwi Center朝聖，觀摩下本地獨有唔識飛嘅雀仔Kiwi。

5日嘅行程話咁快就過去，阿佳真係好唔捨得嗰度嘅天氣，又要返嚟熱辣辣嘅地方開工喇！
行程推介：
新西蘭至尊露營車5天自由行：$7,790起 / 位
皇后鎮3晚自由行：$9,990起 / 位
更多新西蘭旅遊資訊，請參閱：newzealand.com及airnewzealand.hk
網址：travelexpert.com.hk