鄭中基專訪（下）：暴龍哥講旅行

Nov 7 2016

藝人明星去旅行，通常都幾離地？坐頭等？專人計劃行程？好似之前「暴龍哥」鄭中基（Ronald）就帶埋老婆余思敏（Sammie）去了馬爾代夫過二人世界，更在FB分享了一張當地靚到堅．離地的夜景相，記者最初一望，仲以為係酒店廣告相！但睇真才發現，原來靚相的攝影師，就是暴龍哥自己本人！一於等佢講講，作為藝人的旅行和攝影之道：

旅行最怕遇土豪客？

雖然對行程、酒店安排闊佬懶理，但他都有跟老婆講定，最緊要要避開……「太遠的酒店。旅行的日子已經唔長，當然想搵間最方便的酒店！今次呢間距離機場只要 15分鐘快艇，唔似其他要轉內陸機咁煩；同埋搵酒店千祈唔好有太多土豪客啊，好似暴龍哥大大聲惡到死呢種，日日嘈住咩心情都無啦！」但講到最擔心，就梗係一對留在香港的囝囡，「未出發之前好恨過二人世界，但來到馬爾代夫，又好想快啲返香港。俾其他人照顧，始終都係心掛掛，所以每朝我都好早起身，即刻同佢哋 face time先得！」

見到靚景無機又無鏡，揼心！

去旅行，影相打卡是標準動作。不過Ronald的打卡相並唔簡單，而係較少見的馬代夜景。（最常見的絕對是玻璃靚水＋三點式！）

他說：「去旅行影相，用手機當然最方便。不過我唔太鍾意自拍，你見我好少放自拍相就知啦！我多數係影風景、影老婆囝囡，來到馬代，更加變埋老婆的全職攝影師啊！」

其實現實中，Ronald確實是一名攝影發燒友。在訪問中他更直認，他就是網上攝影平台「tinyeyes」帳戶用家，被網民稱為大師級的攝影師。大師去旅行，當然要返一百幾十張旅行相先不枉此行，「本身諗住輕輕鬆鬆出發，無帶很多相機、鏡頭。但當我一見到馬代的夜景就好似太空館咁，成個天都係星，就好想試試影埋夜景！不過今舖蝕啦！手上只有一部Leica、一部潛水相機，反而唔記得帶屋企部SONY A7S， ISO比較高影星一定會更加靚。見到靚景但又無鏡，絕對是攝影師最痛。」

與鯊同游！嚇到眼定定

稱得上「度假天堂」、「一生人必到」，馬爾代夫一向以清澈的海水聞名。分享完他最喜歡的夜景相，日景一樣靚到不得了！即使食過夜粥、去過不少國家旅行的Ronald都大讚旅程難忘，「用電話隨手影都好靚！水清可以見到底，遠望仲有好幾種藍色，應該係我見過最靚的海景啦！加上今次我住的是水上別墅，日夜都對住個靚海。在房內有晒救生衣、潛鏡、潛管，隨時跳落水都得。最難忘係一跳落去浮潛，海入面就係鯊魚啦！我老婆仲要唔識游水，著住件救生衣浮浮下比我仲驚！雖然當地鯊魚品種沒有攻擊性，不過首次與鯊同游，事後諗返依然都驚驚哋！」

明星出遊講架勢？老婆先係最威！

常人如記者我，對明星生活都好好奇。明星去旅行，是否一定要坐頭等？住五星？今次暴龍哥與老婆去馬爾代夫過二人世界， 7日的行程、酒店其實全由老婆發板。Ronald在訪問之中不忘讚老婆安排得好，「其實對於去旅行，我都好求其，坐咩住咩都OK！反而往往因為工作時間，好難抽時間出發，所以今次見完成澳門演唱會有幾日空檔，急急腳叫老婆睇酒店訂飛。她在網上見到這間酒店Baros Maldives的靚相，再睇睇其他訪客評價，便決定訂房啦！她安排埋睇海豚、浮潛活動，好正！我只係負責享受，哈哈！」