Sammi
Sammi

Sammi演唱會頭3場必睇位 李蕙敏做嘉賓大唱《活得比你好》

影視娛樂

廣告

樂壇天后鄭秀文(Sammi)再次喺紅館開騷,13場嘅《#FOLLOWMi》紅館演唱會喺上星期已經進行咗3場。呢3場演唱會,除咗請咗唔少嘉賓,入面仲有唔少感動位值得回味。

撰文:SY|資料來源:寰亞唱片

Sammi喺今個月12日正式展開13場《#FOLLOWMI》演唱會,雖然今年發生咗「安心事件」,但都冇影響到Sammi嘅狀態。第1場演唱會上,Sammi著住純白色紗裙獻唱經典作《終身美麗》,為《#FOLLOWMI》揭開序幕。

第1場 尾聲唱主題曲歌落淚

Sammi第1場邀請咗鄭欣宜同薛凱琪做嘉賓,喺演唱會尾聲,Sammi獻唱《我們都是這樣長大的》,就講咗啲感動嘢。佢話:「人生喺每一個階段 ,都有唔同領悟。人係會長大,會有所不同。嚟到呢個階段,我經歷咗好多,人生有好多嘅沉澱、更多嘅領悟。」

Sammi仲話:「但冇諗過呢首歌已經紅過我啲舊歌,短短幾日好多人都識唱,可能佢觸動到每一個人」「喺我哋成長過程,每個人都有開心、眼淚、經歷同傷痛。但唔緊要,因為我們都是這樣長大的。」

不過,當Sammi唱咗幾句,已經忍唔住喊咗出嚟,令唔少Fans都大叫「唔好喊呀」。

第2場 打破與李蕙敏不和傳聞

Sammi第二場心情明顯比前一日輕鬆,仲騷咗佢嘅健身成果「蜜桃pat」出嚟。而呢晩佢請咗同期出道嘅李蕙敏(Amanda),一見面已經合唱一曲《默契》。

Sammi問Amanda平時點同外籍老公傾心事,點樣用英文去表達地道嘅廣東話。Sammi:「我今日真係㷫過火屎,咁點翻譯。」Amanda:「 angry, very angry, super angry。」

Amanda仲話同老公嘈交,成日都會用廣東話版嘅英文。Sammi之後話:「愛情其實唔使多語言」「其他嘢可以用愛搭救。」

之後Amanda唱出金曲《活得比你好》,仲語帶相關表示:「人生無論遇到幾困難,唱這首歌,聽這首歌,希望得到互相鼓舞,活得比『佢』好。」佢呢句說話都鼓勵到在場唔少人。

第3場 葉蒨文讚Sammi腰細名氣大

Sammi第3場請到相識多年嘅葉蒨文(沙麗),Sammi話:「今晚終於請到一位前輩。」沙麗上台後,就開始互相稱讚對方身形苗條。

沙麗話:「年紀又細過我,條腰又細過我,你想點啫。你個名氣就好大,最重要係名氣大」「你內心大,最重要係呢樣嘢。」之後佢哋就一齊合唱當年金曲《談情說愛》。

最新吃喝玩樂資訊