糖妹轉髮型激罕露額 獲網民激讚靚女：終於放棄瀏海

糖妹的招牌齊蔭髮型陪伴佢出道十年，最近糖妹為投委會錢家有道擔任「香港理財月2021大使」，糖妹專業人士上身在片段中溫馨提示大家要注意網上理財，小心遇上網上騙案，糖妹為突顯專業，一改可愛形象，不但穿上恤衫，又刻意將齊蔭梳側面，激罕露出額頭，網民對糖妹的新髮型一致讚好，有網民更留言：「終於放棄執陰，十幾年都打扮成小朋友咁…」、「糖妹呢個look真係好靚女喎」、「靚版糖妹」、「呢個樣好睇好多」、「糖妹索咗咁多嘅」。

糖妹獲網民一致大讚新髮型好睇，亦現真身回覆網民，多謝網民嘅留言，不過仍不忘提醒大家「最緊要都係學會理財，避開網上嘅理財陷阱﹗」糖妹笑言轉造型成功，連媽媽都以為她轉行了﹗

糖妹出道十年，雖然已三字頭，不過擁一副童顏臉孔，加哈比身高，往往走cutie路線，除了拍劇因應不同造型外，糖妹對其齊蔭髮型一直有一份堅持，她曾透露最緊張這個齊蔭髮型，有次試過上台表演時因大風令她的齊蔭打開，對此她相當介懷，但仍自嘲齊蔭分界變成「延禧頭」，直指自己的齊蔭崩壞﹗今次轉造型獲讚，日後會否一改十年的可愛造型，唔好十年如一日的齊蔭見大家呢﹗

糖妹（黃山怡）去年在無綫熱播劇《香港愛情故事》中相隔六年再和好姊妹王敏奕合作，剛好同期深宵重播二人結緣劇《女人俱樂部》，糖妹同王敏奕的共通點是圈中公認孝順女，糖妹不但孭起頭家，更要年供三十萬給胞弟留學之用。為了搵錢能力提升，有傳糖妹聽從高人指點搬入風水一流的貝沙灣，經濟壓力極重的糖妹，為交租死慳死抵﹗

糖妹去年為《香港愛情故事》宣傳，一身粉紅衫示人的糖妹笑言想旺桃花，直言仍然單身。

糠妹搬貝沙灣

糖妹自小住於深水埗唐樓，被指突然富貴搬到貝沙灣居住，不過出入都是坐港鐵、小巴，糖妹後來澄清是為了方便工作，而且只是月租細單位，月租約兩萬多，並指租金是她日常最大開支，平日好慳儉。有傳慳妹糖妹突然租住豪宅，全因獲高人指點搬到港島南區會有利桃花及財運，事業更可更上一層樓，糖妹聽到高人指點，為貼近上車的夢想，立即聽取從高人建議搬去貝沙灣，惟有在生活上慳得就慳﹗

去年10月三十三歲生日的糖妹，得好姊妹王敏奕（右）及陳瀅為她慶祝，三人因拍攝劇集《女人俱樂部》而成為好友。

糖妹孝順又顧家

糖妹對《香港愛情故事》劇情相當有共鳴，因為也是為上車努力儲錢，經濟壓重，糖妹是家中大女，性格獨立，喺爸爸退休、媽媽係家庭主婦嘅情況下，仲一個人孭起頭家， 同時又為了供養胞弟到英國留學，年花至少三十萬，四年大學已花掉了「首期」，糖妹更明言若胞弟想讀上博士，她會一直供落去，果然是廿四孝家姐。糖妹為家人仆心仆命，更為了家人設想，一早買下廿多份保險，大部分以父母醫療及意外保險為主，她指雖然每月供款都成了壓力，糖妹卻指這是努力工作的最大動力﹗

「糖兄妹」入行十周年

出道十年的糖妹，出道時與糖兄組成「糖兄妹」加入樂壇，糖兄負責作曲，糖妹主力填詞，兩人當年在頒獎禮中更奪得多個新人獎，成績彪炳，而糖妹出道時一直被指酷似陳慧嫻，加上經常表演同埋翻唱慧嫻嘅歌，令不少人都記得佢 。而這個組合維持6年，兩人自14年推出EP《動起來》後，便開始減少一同公開露面，但糖妹話二人不是拆夥，而且私底下一直有合作和聯絡。

糖妹多年來密密做，歌、影、視、廣告、登台、商演都見到佢，山大斬埋有柴，糖妹儲到好多錢，係圈中小富婆！

糖妹：家人是無價

糖妹辛苦工作的收入，係留畀家人用，而不是買名牌包包。糖妹有一個比佢年紀細11歲嘅弟弟，之前考DSE成績一般，心願係到外國修讀心理學，糖妹就喺財力上助佢圓夢：「我細個時都希望去外國留學，結果未能夠實現，既然細佬有清晰目標，就由佢嚟完成我嘅夢想，投資喺家人身上始終係無價嘅！」

年供三十萬送弟英國留學

英國脫歐後，糖妹稱弟弟到當地升學唔算平 ，一年開支至少三十萬，佢話﹕「細佬去讀書由我負擔，開支票嗰一下，個心真係穿咗個窿，學費、保險仲有其他雜費，加起嚟都接近三十萬，所以我要努力工作啦！」佢笑言細佬靠晒佢，所以佢都要增值自己，學多啲語言去唔同地方交流，順便搵真銀。

糖妹慳家搭港鐵

糖妹日常生活相當貼地，家住深水埗唐樓，出入都係以港鐵代步：「搭港鐵既環保又可以控制時間，工作講誠信，準時抵達令人留下好印象，人哋先會再搵你做嘢，咁樣先可以能賺得更多。以前我都會覺得搭港鐵有啲唔自在，但長大咗就冇呢回事，人哋可以搭，點解我唔得？只係大家職業唔同啫！」

糖妹最希望請全家旅行

糖妹其實好叻女，一個女仔孭起頭家、自己使費、弟弟留學費，所剩無幾，佢最大嘅心願就係請全家人一齊去旅行，認為呢件事勢在必行！

孝順女糖妹帶阿媽去澳洲跳傘

雖然呢個心願暫時未做到，但之前糖妹趁去澳洲登台嘅機會，帶埋阿媽一齊去旅行，兩母女上山落海，玩得好盡興⋯⋯佢仲爆糖媽勇字當頭撩佢去玩跳傘：「佢話唔想去睇嗰啲景點，話不如去玩跳傘，我好驚㗎！後尾我哋真係去咗跳傘，仲有浮潛，海陸空都玩晒！」不過糖妹見媽咪玩得好開心，充滿活力，連佢自己都開心埋！

吃貨糖妹 最大支出是飲食費

愛吃的糖妹話樣樣都會慳，但在飲食一定唔會慳，而這方面的支出也不少，之不過吃得開心又能減壓，也是為生活和工作帶來更多力量！糖妹說她習慣用一張信用卡，這樣可以控制支出，而且又能集中儲一張信用卡的積分，其實她在理財方面也很精明！

糖妹公餘和「明哥」去做義工

雖然忙於工作，但糖妹也會為社會出力，她不時和歌迷會成員去做義工，之前糖妹就同深水埗「明哥」拉隊去派飯，全程落手落腳做，真係好有善心！

黃美棋、鍾健威考定牌出埠潛

糖妹(黃山怡)早前孖黃美棋齊齊考潛水牌，去年一行人到西貢潛完水，糖妹跟大隊去望海睇景，之後再去黃美棋的村屋玩樂，呢個Staycation真特別。黃美棋與男友鍾健威有共同嗜好，喜歡音樂與運動，閒時一齊健身與滑水，拍拖生活絕不枯燥，前年開始他們更一齊跟教練學潛水，探索香港美麗的海洋世界，近年受疫情影響，在限聚令下社交活動驟減，不過潛水次數反而增加。

招呼糖妹staycation潛水擦海鮮

因為疫情不能外遊，黃美棋與鍾健威在香港潛水一樣找到樂趣，就連糖妹（黃山怡）亦受到好姊妹感染，跟同一個教練學潛水，據知情者透露：「美棋本身游水唔叻，對水上活動都麻麻，但阿 Ray（鍾健威）好鍾意玩水上活動，去年美棋跟阿 Ray去潛水，畀海底世界吸引住，發現原來香港都可以有咁多咁靚嘅珊瑚同海洋生物，所以就鍾意咗潛水，仲成功考埋潛水牌，等疫情一過，佢哋就飛去其他地方潛水。美棋仲導埋糖妹一齊做海之女，得閒就約埋出海，潛完水就返美棋屋企食吓海鮮玩吓，當去酒店 Staycation咁，多幾個人都唔怕違犯限聚令。」

早前黃美棋與糖妹一同現身西貢，看二人素顏一身隨意打扮，看來剛出海潛完水，同行除了鍾健威，還有他們的潛水教練堅 Sir及一男友人。一行五人在西貢茶餐廳醫完肚，便坐上教練的四驅車，直駛黃美棋與鍾健威的西貢村屋愛巢。到達後黃美棋先返家，糖妹與其他三人就行到附近的海邊視察環境，三王一后望完海就拉大隊返回黃美棋屋企。在黃美棋的社交網中可看到她與鍾健威的生活點滴，離不開食與玩，三日唔埋就準備大量海鮮 BBQ或打邊爐招呼好友，學定潛水做海女，第時可以自給自足囉！