直擊愛妻號劉青雲緊張護郭藹明 疫情下出關超市上糧高度戒備

原文刊於《東方新地》

劉青雲減產陪太太與郭藹明閉關一樣好有情趣

一場新冠肺炎疫情打亂香港娛樂事業，唔少電影被煞停，影帝劉青雲亦受影響，原本今年開拍的電影《掃毒3》，亦要延期至明年待疫情穩定後才開工，閉關留家抗疫，對好好先生劉青雲而言，反而可以有更多時間陪愛妻郭藹明，夫妻閉關一樣好有情趣。據知情者透露，片約不斷的青雲，其實近年已開始減產，每年只拍兩、三部電影，留更多時間陪太太。「係人都知青雲好錫老婆，佢好享受家庭生活，兩公婆就算唔出街都好有生活樂趣，所以疫情閉關，對佢哋嚟講一啲都唔會悶，青雲本身就好鍾意煮嘢食，以前就算開工一有時間都會親自下廚煮兩味，疫情閉關唔使做嘢，佢就日日下廚為樂，煮愛心餐𠱁老婆，兩公婆又會一齊整愛心牛扒飲下紅酒，非常之浪漫。佢兩個都追求簡單，喺屋企一齊睇電影、做運動或者外出散吓步已經好享受！」

疫情下到超市上糧 人流少時段出動

日前，疫情下二人拍拖出關到超市上糧，雖然疫情稍緩，不過兩人防疫未有鬆懈，專登揀超市人流較少的時段才出動買餸。貼地的青雲夫婦，當日穿著簡約衛衣頭戴Cap帽打扮樸素，青雲更孭住一個平民連鎖時裝店的贈品環保袋，影帝有幾隨意可想而知。同老公青雲keep住養生的Amy（郭藹明），當日二人就主攻有機食物，買齊嘢後，青雲好自然負責推住手推車，體貼老婆不用她操勞。養生有道的郭藹明，53歲素顏下雖然戴住口罩，仍可見凍齡保養得宜，身材更完全冇走樣。可能疫情閉關多時，青雲戒心變得分外重，見有陌生人遠處拍照，隨即通知身旁的老婆，又以凌厲眼神望住遠處，表現緊張護妻，之後認出是記者，又見老婆一臉淡定大方揮手，青雲才如釋重負放下戒備，好好先生回復友善，跟住老婆一齊向記者打招呼，婦唱夫隨默契盡在不言中。

西貢西沙小築獨立屋 老婆鍾意即扑槌

婚後男主外女主內，青雲更將財政大權交給老婆郭藹明掌管。善於理財投資的劉太，多年來炒賣物業從未失手，幫老公滾大身家。14年底劉青雲以3,280萬買入現居的西貢西沙小築獨立屋，裝修了兩年多才入伙，據悉當時青雲即使知道該物業比同區樓價市值高出一成，依然扑槌購入全因老婆喜歡。據知情者透露：「佢兩個鍾意住郊區，特別鍾情西貢，不過西沙小築好少有放盤，嗰次兩公婆一齊睇樓， Amy一睇已經好鍾意，嗰度環境清幽又有無敵海景，完全係Amy心中嘅Dream House，因為係老婆心頭愛，青雲二話不說即刻扑槌買。由於樓齡有成三十幾年，間屋要大翻身，搞咗兩年幾先完工。」

添置新家品注重品質和實用

早前疫情未嚴峻時，青雲夫婦便結伴出動為愛巢添置新家品，二人專登去到沙田大型商場連逛多間家品店，貼地影帝買嘢亦唔會只攻名牌貨，反而更注重品質和實用，二人去到平民家品店一樣睇得非常暢快，青雲更睇中兩棵仿真樹盆栽，還不拘小節踎低仔細找合適花盆配搭，最後兩公婆合力推住戰利品到收銀處付款。其實萬能賢內助郭藹明早就是格價專家，17年本刊便拍到她單拖出動，為愛巢落區去揀優質及實惠的裝修材料，幫老公慳住荷包，夫妻價值觀如此一致，果然是天造地設！

劉青雲得周慧敏牽線「太空船論」感動郭藹明

外表cool爆的劉青雲不但對老婆體貼呵護備至，更是個會講情話的深情暖男，15年金像獎台上一番「太空船論」，不只感動賢妻淚如雨下，更打動萬千女性心，大家都羨慕郭藹明身邊有個愛妻號老公劉青雲，同樣地大家亦羨慕青雲娶到個有美貌高智慧的賢內助，夫妻一凹一凸完美無瑕。

轉眼結婚廿二年，劉青雲、郭藹明恩愛有增無減，愛情長久保鮮全因一直相敬如賓。二人92年合拍《大時代》結緣，頂著「最高學歷港姐銜頭」的郭藹明，更放棄做美國航天公司工程師的工作機會，甘做劉青雲背後女人默默支持老公。郭藹明受訪曾透露夫妻相處之道，她會視老公是愛人又是朋友，至今仍會跟對方說唔該及多謝，保持那份感情熾熱；而外表cool爆的劉青雲，更不止一次公開向太太發表愛的宣言，從不吝嗇表達對老婆的愛意。最經典莫如15年在香港電影金像獎頒獎禮上，憑《竊聽風雲3》奪得「最佳男主角」的他，在台上多謝太太郭藹明發表「太空船」愛的宣言：「每次當我揸住太空船，飛到宇宙唔知邊度，你總有辦法令我安全返回地球！」真情表白打動萬千影迷，台下老婆更被他感動至眼濕濕。