獨家直擊沈震軒、陳欣妍同居試婚 鼓勵女友行性感二人禁室狂操

原文刊於《東方新地》

沈震軒以往緋聞多 今為陳欣妍放棄整個森林

沈震軒入行十五年，一直等待機會上位，14年終於憑無綫劇《使徒行者》Kobe一角搶fo成功，當時有傳他是執三攤頂上，角色本屬森美，他因健康問題辭演後，馬德鐘都唔接，沈震軒才獲此機會，可惜翌年因為高調放風話約滿後唔再簽無綫被放入雪櫃，16年離巢向外闖，星海浮沉三年還是覺得樹大好遮蔭，沈震軒去年回巢拍劇兼簽埋邵氏，重新發力。

以往戀事多籮籮，媾女戰績彪炳的沈震軒，無論事業或感情都不再兒嬉，多年來對象包括賈曉晨（JJ）、倪晨曦、蔡思貝及唐詩詠等等，不過從來無人可以令他放棄整個森林，直至三年前遇上現任女友陳欣妍，沈震軒再沒與其他異性傳過緋聞，從此變得定性。二人因為合作拍微電影《狼人遊戲》一撻即著，當時沈震軒正處於事業樽頸位，陳欣妍剛出道毫無知名度，因為愛演戲而入行的她，去年與沈殷怡組成「Double S」為ViuTV演出行山真人騷《美女郊遊遊》，身穿性感bra top野外谷胸極度吸睛，成功令兩女彈起。

鼓勵陳欣妍行性感 二人禁室狂操

女友變成大眾性感女神，幾乎集集著bra露肉益街坊，難得沈震軒唔介意，仲身體力行支持到底，據知情者透露：「Sammy（沈震軒）覺得自己都係過來人，初出道畀人定型係花弗男，演嘅角色大部分都邪邪地，好多嘢都力不從心，好難洗底，條路會比較難行，不過佢就鼓勵Shirley（陳欣妍）放膽去做，性感唔係罪，只要肯堅持落去，一定會有路行。為咗令大家都操弗啲，Sammy仲花幾十萬喺佢加州花園屋企後園起咗個帳棚，入面放滿各式各樣嘅健身器械，總之由頸到腳都有得練啦！早前抗疫冇工開，佢同Shirley就 日 日 留 喺 屋 企 狂操，佢就練到筋肉人咁，女友就成個figure靚晒！」在沈震軒及陳欣妍的社交網內，有大量健身室的實地照片，所有健身器材都非常專業而且好巨型，除了這個在後園自建的健身室，屋內更有跑步機和多部單車機，完全不假外求，可以足不出戶鍛鍊身體。二人更互相拍下對方的健身片段及拍照，非常有情趣。

視女友為結婚對象街坊裝踢拖食早餐

日前沈震軒與陳欣妍一齊離開加州花園到附近食早餐，二人身穿街坊裝踢拖好貼地，食早餐期間卿卿我我傾唔停，食飽仲十指緊扣甜到漏，睇得出沈震軒對住女友「冧滋滋」，過往man爆浪子形象蕩然無存，早前他更公開畀定心丸陳欣妍：「我每次拍拖都會以結婚為目標，我係一個幾傳統嘅人，都37歲喇！覺得啱時間就會做，我都希望快啲成家立室。」