凍齡鍾楚紅60大壽仙氣不減不愛P圖靚相直出開心Share

新假期 - 影視

Feb 28 2020

廣告

紅姑鍾楚紅淡出影壇多年，只久不久出席品牌活動露吓面，閒時相約友好飯敍、行山，生活健康低調。本月16日剛60歲生日嘅紅姑，踏入生日月以來連日都有大班朋友排住隊同佢慶祝，紅姑拍埋細佢12歲嘅陳慧琳(Kelly)身邊，一啲都唔遜色，仙氣不減當年！

撰文：東方新地、圖片：網上資料/鍾楚紅FB 微博

鍾楚紅60大壽仙氣不減 Kelly、蔡瀾爭相祝賀

從來唔鍾意P圖嘅紅姑，將連日來嘅「登六」生日飯局相直接放上網開心share，以最自然、最有自信嘅真實一面示人，見紅姑笑容燦爛、皮膚白滑，依然索到啪啪聲！而飯腳除有Kelly外，仲有蘇施黃、蔡瀾、美指奚仲文、經理人鍾珍等等，大家為紅姑送上多個靚靚生日蛋糕，仲有一大籠壽桃，紅姑心情大靚，全程展示其招牌魅力笑容。紅姑更留言感謝好友：「謝謝大家的祝福，今年的願望是祝願大家身體健康，平安。」得到咁多人愛錫，難怪紅姑時刻都咁開心啦！

紅姑拍埋細佢12歲嘅Kelly身邊，一啲都唔遜色，依舊凍齡，不減當年氣質美貌。

同阿蘇頭貼頭合照，影大頭相都冇有怕，60歲嘅紅姑一樣咁索！

好友飯局不停，又送上一大籠壽桃，令紅姑笑逐顏開。

飯腳除有Kelly外，仲有蔡瀾、美指奚仲文、經理人鍾珍等等。

紅姑見到生日蛋糕時，笑容燦爛地張開雙手擺甫士影相，甚有少女味。

其實阿蘇為紅姑慶祝生日嘅同時，佢本身都係2 月壽星，遲紅姑一日 65 歲生日。

鍾楚紅風情萬種仙氣照晒冷

雖然已經「登六」，但紅姑依然魅力不減。睇返佢當年啲相，唔使P圖都仙氣十足，真美女果然經得起時間考驗！

關鍵詞