余香凝突然公布婚訊、蘇玉華潘燦良拍拖24年終註冊！12對疫下情緣逐對look

原文刊於《東方新地》

余香凝

上月初先被揭未婚懷孕，再出po 自認結婚，余香凝雖然沒有親自否認有孕傳聞，不過公布婚訊來得突然，僅僅一個月後就喺半島舉行婚禮，係有啲趕時間。

岑杏賢

舊愛袁偉豪喜事近，岑杏賢亦都已經搵到另一半，據悉圈外男友 Kelvin 一早求婚成功，二人最近亦被發現入紙擬結婚通知書，不過婚禮詳情就尚未公布。

袁偉豪 張寶兒

自爆去年9月已經喺加拿大求婚成功，袁偉豪同張寶兒呢一對順理成章物色愛巢籌備婚禮。可惜買完樓疫症都未受控，據悉二人將於今年內先註冊，婚禮則會押後舉行。

呂方

一向表示不婚不育嘅呂方，今年5月竟雙喜臨門，被爆老婆陀 B 5個月時順手結埋婚，令到一切名正言順。B女今年8月出世，兩公婆一向低調，未有公開會唔會再有婚禮舉行。

蘇玉華 潘燦良

拍拖24年、同居都已經十幾廿年，蘇玉華同潘燦良呢一對一直對外表示生活早如老夫老妻不爭在一紙婚書，點知今年5月卻突然入紙登記結婚，蘇玉華話受一位男同性戀友人離世啟發，而改變了想法。

何雁詩 鄭俊弘

今年元旦日宣布婚訊，鄭俊弘和何雁詩原定婚禮一早定喺本月7日，疫情反反覆覆好彩近日終於又再放寬限聚條款先擺得成。

譚凱琪

今年2月譚凱琪被傳媒發現入紙申請結婚，當時就話要視乎疫情受控情況才能決定擺酒宴客日子。不過早於3月15日譚凱琪已秘密簽紙及進行斟茶儀式，至上月19日囡囡都出埋世，疫情仲係反反覆覆，可能要等到囡囡百日宴順便補擺喜酒。

倪晨曦

去年答應圈外男友Vincent求婚便一直悉心籌備婚禮，可惜大住肚BB就快出世，都未有香港擺酒落實日期。好彩倪晨曦醒目，今年初爆發疫情前已經去咗夏威夷同至愛親朋舉行小型婚禮。

姜麗文

今年2月2日姜麗文突然於 IG 上發布婚訊，配上 T-shirt、牛仔褲、水鞋一身農場look白頭紗婚照，原來籌備一年嘅婚禮被迫推遲，只好一切從簡婚宴後補。

莊思敏

去年9月宣布與台灣珍珠奶茶店老闆Brian拍拖，今年2月已經被揭入紙申請結婚，又係因為正值疫情第一波，二人於3月的婚禮簡簡單單就在家中簽字行禮。

彭懷安

同朱慧敏離離合合多年，今年3月18日彭懷安突然與圈外女友Ivy舉行婚禮，不過礙於當時正值疫情第一波，酒席都係盡量縮減只開數席。

港男吳雲甫

今年3月1日，前港男吳雲甫就同拍拖未夠一年嘅瑜伽導師女友林瑋如，喺尖沙咀文化中心註冊結婚，而原定嘅盛大婚宴都取消，變成行禮後雙方親人食餐飯就算。