刺身及燒物放題@Dining娜
只要有好嘢食，天涯海角都要去，係我人生座右銘。香港山旮旯隱秘小店我都會去試，何況只係區區搭一個鐘船過澳門？實在太輕鬆了吧。呢間貴族爐端燒係澳門英皇娛樂酒店地下，入面裝修似足《深夜食堂》咁嘅款，好有日本feel。我今次就揀咗係壽司吧檯，板前長係有30年日本料理經驗嘅小野利春總廚，當晚仲有靚仔師傅係我面前負責劏刺身同整壽司，感覺同頂級日本壽司店無分別，但我今次其實嚟食放題！
先點咗個和風沙律同日式豆腐做前菜，沙律菜好清爽，豆腐好又有豆香，加上日本醬湯、紫菜絲同柴魚絲，非常開胃。接力登場當然係主角剌身！經過小野總廚嚴選嘅海鮮，唔止特別新鮮，而且脂肪感剛剛好。我最推薦Hamachi油甘魚，油脂夠多，肉質比較結實，魚味超級濃郁。另外，北寄貝、甜蝦都係點，前者好新鮮，口感彈牙；甜蝦蝦頭有膏，而且頗厚肉，我唔捨得點太多wasabi去破壞佢鮮味。
鍾意海鮮嘅朋友，英皇娛樂酒店仲有另一個選擇。9樓嘅御廚Royal Kitchen嘅自助餐同樣主打新鮮海鮮，有我最鍾意嘅麵包蟹，大大隻麵包蟹蒸熟之後迅速冷藏，可以完完全全將蟹汁封住，因此肉質特別鮮甜。另外seafood bar仲有海蝦、角螺、青口同藍青口等等唔同選擇，由於食材好新鮮，只要加少少檸檬汁同Tabasco，就完全帶出鮮味。
御廚自助餐最特別之處係每個客人都有一份大廚特製嘅主菜，每兩個月轉一次，5月輪到法式走地春雞釀黑松露菌！好係乳鴿咁大嘅法國農場走地春雞，細細隻肉質特別嫩，用白酒、洋蔥、乾蔥醃咗10個鐘之後，再釀入黑松露醬、炒洋蔥同西芹烤焗，黑松露嘅芳香完全滲入雞肉，食完令人不停回味！
貴族爐端燒
地址：澳門南灣澳門商業大馬路288號英皇娛樂酒店地下（顯示地圖）
電話：+853 8986 9918
貴族爐端燒晚巿放題
星期一至四 成人$238 小童$208
星期五至日公眾假期 成人$268 小童$218
晚巿時段：6:00pm-8:45pm / 8:45pm-10:45pm
御廚 Royal Kitchen
地址：澳門南灣澳門商業大馬路288號英皇娛樂酒店9樓（顯示地圖）
電話：+853 2838 9988
御廚自助晚餐
星期一至四 $298
星期五至日公眾假期 $348
晚巿時段：6:00pm-10:00pm
Facebook：Grand Emperor Hotel 英皇娛樂酒店
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
