【香港博物館節2026】11月下旬4大同樂日精選推介!
就算臨近11月下旬,博物館節精彩嘅活動依然一浪接一浪,節目覆蓋港九新界,大家可以透過導賞、工作坊同各類表演,以老少咸宜嘅方式深入細味香港文化底蘊。而今年嘅博物館節亦係第六屆粤港澳大灣區文化藝術節響應節目。即刻率先為大家重點介紹4大必玩嘅同樂日活動啦!
1.|葛量洪號滅火輪展覽館探索日2026
想了解香港消防及海上救援嘅故事?参加「葛量洪號滅火輪展覽館探索日2026」,可以透過多項嘅教育活動同埋親自探索滅火輪船上嘅設備及駕駛室,深入了解駐船消防員嘅職責;同時仲可以近距離欣賞滅火輪噴水表演及海上救援示範。小朋友更有機會穿上消防服,化身小小消防員拍照打卡!連串精彩活動,絕對不容錯過~
葛量洪號滅火輪展覽館探索日2026
日期:2026年11月21日 (星期六)
時間:10am – 6pm
地點:香港鰂魚涌公園
2.|油街 Fresh!同樂
享受chill爆假期~參加「油街 Fresh!同樂」就啱晒啦!呢個活動係由油街實現聯同藝術推廣夥伴領賢慈善基金(FIF)及社區共創夥伴嘉頓,帶嚟與別不同嘅藝術體驗!包括特色工作坊及即場體驗活動,帶領公眾重新感知城市嘅文化脈絡與鄰里溫度。
特別推介「GATHER! 社區野餐」*,可以同親朋好友户外野餐相聚之餘,仲可以欣賞到世界口琴冠軍李俊樂配合城市聲音嘅精彩表演!藉住音樂同食物,一齊感受社區嘅溫暖氛圍!
*提提大家,野餐活動記得要預先報名呀!
油街 Fresh!同樂
日期:2026年11月22日 (星期日)
時間:10am – 6pm
地點:油街實現 (北角油街 12 號)
3.| 孫中山誕辰暨館慶文化樂聚2026
為慶祝孫中山先生誕辰160周年及孫中山紀念館20周年,紀念館將舉辦連串活動,包括工作坊、講座、導賞及電影放映等,增進公眾對孫中山先生、中國近現代史及甘棠第建築特色嘅了解及興趣。當日嘅精選活動包括「中山先生生日會」、「懷舊長衫試著體驗」、「Q版孫中山拼豆工作坊」等。藉住各種活動體驗不一樣嘅紀念館,十分適合帶埋小朋友去㗎~

孫中山誕辰暨館慶文化樂聚2026
日期:2026年11月28日 (星期六)
時間:10am – 7pm
地點:孫中山紀念館 (中環半山衛城道7號)
4.|香港抗戰及海防博物館探索日2026
壓軸嘅仲有「香港抗戰及海防博物館探索日2026」,透過一系列與抗戰歷史相關嘅活動,等大家對過往歷史有更深入嘅認識!
鍾意解謎嘅朋友可以參與「抽絲剝繭:博物館尋寶遊戲」,藉著探索博物館尋找所需答案,答啱問題嘅參加者仲可以領取精美禮品添!平時行博物館好鍾意欣賞文物嘅你,可以預先報名參加「館長解密:抗戰文物的重生與記憶」。由文物修復人員親自講解同示範,而參加者亦可以親手實踐,將作品印製喺環保袋上留念,好有紀念價值!
此外,現場仲有「寓史於樂:抗戰汽球攤位」到時會免費派發和平鴿、鮮花、槍同大砲等造型氣球;同日下午將舉辦「烽火樂章:抗戰音樂會」,樂團會演奏多首與抗戰相關嘅樂曲。節目非常豐富,絕對能令你大大增進對抗戰歷史嘅認識!

香港抗戰及海防博物館探索日2026
日期:2026年11月29日 (星期日)
時間:10am – 5pm
地點:香港抗戰及海防博物館 (筲箕灣東喜道175號)
一齊探索香港文化故事!
「香港博物館節2026」仲有更多精彩活動!想發掘更多香港故事,體驗文化尋蹤嘅樂趣?就快啲mark低時間同親朋好友一齊去探索啦!
按此查看更多詳情
(Presented by LCSD)




