港鐵扶手電梯「攝位」算唔算打尖？網民自爆一招反擊攝石人

Threads用戶上載逼爆相片掀起攝位爭議

Threads用戶hckittt於14日發帖，上載港鐵站內扶手電梯前人頭湧湧嘅相片，直接拋出一個令唔少打工仔心裏面掙扎已久嘅問題——「排扶手電梯喺側邊攝入去算唔算打尖？」帖文一出即刻引爆討論區，反對派網民即時開火，直斥「攝位」行為「超憎」、「勁討厭」，有人更搬出日本同台灣做例子，強調就算地面鋪冇劃線，都應該遵守無形規範。另一邊廂，有乘客大呻自己乖乖排隊，結果「排到2046都未行到去條電梯度」，甚至有人因為跟住人流慢慢行到電梯口，突然被後面阿姐指責插隊，嬲到唔知點算。

網民群起公審攝石人紛紛自爆阻截絕招

事件曝光後，大批網民替乖乖排隊嘅乘客不值，紛紛分享自己對付「攝石人」嘅實戰妙法。有人表示一感覺到身邊有人想從左邊攝入右邊，就會即刻緊貼前面嗰個人、完全唔留空隙，令對方無位可攝. 更有網民霸氣宣言「我而家會用手踭同鞋擋！唔俾佢哋插隊」，獲得大量附和。不過討論區並非一面倒聲討，支持「攝位」嘅一派亦企硬反駁，指落車乘客從四面八方湧出，根本無可能人人都兜去龍尾排隊，質問「唔通行去龍尾排隊咩？」，又指車站設計本身就令電梯口附近嘅人可以先上，強行要求所有人排隊並不切實際。

兩派始終未達共識有人話呢個係港人獨有默契

經過一輪激辯，兩派網民最終都未能說服對方。不過討論之中殺出第三種聲音——有網民指出「攝位」其實係香港人特有嘅「默契」，形容大家習慣「1212咁樣梅花間竹」交替踏上電梯，係真正香港人先會明嘅潛規則。亦有人劃出一條微妙界線：「落車冇耐就攝開我OK，臨上電梯嗰一刻先攝就唔OK」，點明時機先係關鍵。但最現實嘅一句，恐怕係有網民講嘅「呢啲九成人唔會出聲，會由佢」，道出大部分乘客面對攝位情況時嘅真實反應——心裏面鬧爆，但現實中默默忍受。