大學生未畢業先考保安牌！網民激讚「少走50年彎路」過來人卻揭殘酷真相？

港男大學生考保安牌傍身自覺好型發文求問係咪真係好好賺

事主喺文中提到，自己仲讀緊大學，但同朋友一時興起就決定齊齊去考保安牌，最後亦順利合格。佢拎到牌之後不禁沾沾自喜，覺得「自己有個牌揸手好似幾型下」，不過由於從未真正返過保安工，所以就忍唔住上網發文，向廣大網民求問：「係咪真係好好賺㗎」。呢個帖文一出，即刻引嚟大量網民圍觀，唔少人仲話睇完都心郁郁想去考返個！

網民群起力數3大優勢大讚係吊命神工可以少走50年彎路

事件曝光後，大批網民替事主嘅決定感到興奮，紛紛留言力撐！有網民歸納出保安工作有「3大優勢」，服務包括入夜後極度自由、就業機會多、而且工作時間彈性時薪又高，簡直係完美嘅「及時雨」吊命工種，更有人誇張表示呢個決定可以「少走50年彎路」！有過來人分享經驗：「返夜更過11點差唔多就冇人理你，每更大該有7個鐘free time，歎冷氣篤下手機，就袋萬零蚊入手」、「我一開始都返夜更保安，夠鐘就去打鐘，打完返埋位炒美股，不知幾爽」，睇到唔少人都心郁郁想即刻報名。

過來人潑冷水揭殘酷真相返夜更隨時抑鬱兼要拎藍卡先做得

不過，正當大家以為保安係絕世筍工之際，亦有過來人留言大潑冷水，揭開殘酷真相！有網民警告，後生仔唔好隨便做保安，尤其係夜更，「因為太得閒個腦會有好多時間諗其他嘢，越諗越容易抑鬱」。佢解釋，份工唔係難做，而係後生仔未必頂得順嗰種無了期嘅無聊感。此外，更有人溫馨提示，考到QAS基礎保安訓練證書唔代表可以即刻開工，必須要再向警務處牌照課申請俗稱「藍卡」嘅保安人員許可證，先可以正式執業搵食！