老闆怒吼一句「滾」！8年老臣照做即走 半個月後收信結局神反轉

事主聽足老闆指示即走竟反被指曠工炒魷

事件主角係喺公司做咗8年嘅資深經理丁先生（化名），因為工作安排同馮總（化名）喺辦公室發生爭執。期間馮總情緒一上嚟，就對住佢大嗌一個「滾」字！丁先生當下理解為老細要將佢驅逐出公司，於是無再爭辯，即刻收拾個人物品離開，返屋企等消息。點知由5月中等到6月初，等唔到公司嘅新指示，反而係一封冰冷嘅解僱信，理由係佢「擅自離崗、多日曠工」，簡直係晴天霹靂！

初審一度敗訴被屈曠工打工仔慘食死貓

被公司屈曠工再無情炒魷，丁先生當然心有不甘，認為自己只係遵從老細指令，於是申請勞動仲裁，要求公司支付近16萬人民幣嘅違法解僱賠償金。可惜，仲裁並唔支持佢嘅申索。佢決定告上法庭，但一審法院竟然都判佢敗訴，認為單憑一個「滾」字，唔足以證明老細係叫佢「滾出公司」，佢之後無返工就構成曠工，公司有權炒佢。睇到呢度，係咪都覺得好無天理？

二審揭老闆曾叫佢返屋企等消息成驚天逆轉關鍵

幸好丁先生無放棄，堅持上訴。去到二審，案情終於出現驚天大逆轉！法官調查發現幾個關鍵細節：第一，喺丁先生缺勤期間，公司人事部從來無通知過佢返工，亦無作出任何處分；第二，最關鍵嘅係，丁先生曾經返過去公司，問老細「仲要唔要我返工？」，當時老細親口回應「先回去等消息」！呢一句成為致勝關鍵。法官認為，公司指令模糊不清，加上老細叫佢等消息，因此唔可以將佢嘅缺勤視為曠工。最終，法院推翻原判，裁定公司違法解僱，需要向丁先生賠償159,800元人民幣（約18.3萬港元），總算還佢一個公道！