70歲阿婆半年豪擲330萬！全家積蓄清零窮到交唔起電費 兒子崩潰揭沉迷真相

70歲阿婆沉迷直播PK半年課金330萬

事主王先生因為信任阿媽江阿婆向來精打細算，所以將自己多年嘅血汗錢同獎金全數交由母親保管，點知呢筆「救命錢」、「棺材本」竟然一鋪清袋！原來70歲嘅江阿婆迷上咗直播平台嘅「PK機制」，為咗幫心儀主播打贏對手，竟然「衝動上腦」瘋狂課金。佢為咗撐場，頻頻送出「桃花島」、「一見鍾情」等天價虛擬禮物，每份價值高達2,000至3,000元人民幣（約2,300至3,400港元）。數據顯示，江阿婆由去年5月起，短短半年就燒咗330萬人民幣，平均每個月課金超過50萬！

兒子崩潰鬧爆成癮行為比吸毒更恐怖

事件曝光後，王先生接受訪問時完全崩潰，佢表示返到屋企先發現所有錢都冇晒，連水電費都係要靠佢交。佢多番勸說後，阿媽先有啲醒悟，但之前竟然仲想用啱啱出嘅退休金繼續打賞，令佢不禁怒斥：「我真的是覺得鬼迷心竅了！」王先生更質問母親：「吸毒一個月要多少錢？你比吸毒還厲害！」江阿婆事後亦非常後悔，坦言自己當時已經「麻木了，人什麼都不知道了」，覺得非常對唔住個仔。

主播冷回八個字追討330萬凍過水

眼見全家積蓄化為烏有，江阿婆曾嘗試聯絡獲贈最多錢嘅兩位主播，希望對方可以回水，點知對方只係冷冷拋下一句「好好相處，細水長流」，之後就完全潛水。王先生亦曾向網信辦、市場監管局等多個部門同平台投訴，但至今都冇任何實質進展。睇嚟呢筆高達330萬嘅「棺材本」要追得返，機會可以話係極之渺茫，真係慘過貼錢買難受！