遊日酒店房午睡驚魂！房務員無人應門竟直接闖入 台女1個舉動嚇壞網民：完全無安全意識！

台女午睡無鎖內門房務員竟直接闖入

事主喺社交平台Threads大呻，話自己去日本旅行到第5日，因為行程太攰，下晝就喺酒店房張床度休息。點知房務人員係咁按門鈴，但佢實在太攰唔想郁，就無理到。最恐怖嘅係，因為佢無鎖到房入面道內門鎖，房務人員竟然就咁直接開門入咗嚟！見到事主瞓咗喺床，職員就問佢需唔需要打掃。估唔到事主不但無嚇親，仲超淡定咁話：「沒關係你就清吧，我實在不想動」，然後就喺床上面眼定定望住房務員打掃，仲拎部手機出嚟拍低成個過程放上網分享！

網民群起公審鬧爆事主安全意識極低

事件曝光後，大批網民睇到事主嘅帖文同影片都嚇到傻，紛紛留言鬧爆佢完全無安全意識！有網民怒斥：「咁樣好危險！同唔識嘅異性喺房入面，你仲要瞓喺床！萬一起色心，你走都走唔切！」、「唔明做啲令自己暴露喺危險中嘅事，仲要po上網係咩心態」。更有唔少過來人分享自己嘅尷尬經歷，話「試過著住內褲，房務員就入咗嚟收垃圾」、「喺馬來西亞酒店沖緊涼，清潔員突然入嚟問要唔要打掃」，情況極度嚇人，奉勸大家一定要鎖好門！

事主親自解畫稱唔識用請勿打擾掣

面對網民洗版式嘅批評，事主亦親自留言解畫。佢解釋當時因為室友出咗街，為咗方便室友返房先無鎖內門，加上酒店無提供「請勿打擾」掛牌，而佢又唔識撳房內嘅「請勿打擾」掣，先會搞出今次嘅大頭佛。有自稱喺日本酒店做過房務實習生嘅網民就出嚟補充，話如果客人無特別通知或者掛牌，佢哋為咗維持服務質素，會先按鈴敲門3次，無反應就會開門入房，如果見到客人喺房就會再詢問，似乎係酒店嘅標準程序。不過無論如何，今次事件都為大家敲響警鐘，出門在外真係要時刻保持警覺！