國泰驚見「有味兇器」！大叔機艙除鞋晾前座狂捽 鄰座食緊飯全程直擊勁嘔心

台灣乘客直擊嘔心全程大叔赤腳晾前座係咁撩

事源有位台灣男乘客喺社交平台Threads上傳影片，大呻遇到「狗血短劇才會出現的人種」。從影片可見，喺一班國泰客機上，一名戴住頭戴式耳機、坐近走廊位嘅大叔，竟然將鞋都除埋，然後將左腳赤裸裸咁成隻晾咗上前面個位嘅椅背頂！離譜嘅係，佢隻腳完全無停過，腳掌同腳趾係咁前後撩動，期間更疑似伸出尊貴嘅右手「捽腳」，動作極不雅。更令人倒胃口嘅係，當時明顯係飛機餐派餐時間，唔少乘客嘅餐桌都已經打開，上面仲擺住餐點，呢位大叔嘅「有味」舉動，真係隔住個mon都覺得難頂！

影片瘋傳網民群起洗版鬧爆行為極度自私

影片曝光後，隨即在網上被瘋狂洗版，大批網民睇完都鬧爆該名大叔行為極度無品兼自私！唔少人都替前座乘客感到不值，「坐佢前面嗰個真係慘」、「呢個畫面感太強，隔住螢幕都感覺到嗰股味」。有網民更狠批：「長得人模人樣，還可以這麼沒水準」、「媽媽沒教還是自己沒教養？」更有乘客表示如果自己喺現場，一定會出聲喝止：「我會即場xyz佢，叫佢放返好佢隻臭腳！」甚至有人建議航空公司應設立更嚴格嘅禮儀規定，違規者就應該被拒載，以儆效尤。

空服員終出手制止網民估動機或涉前座爭執

正當大家替前座乘客擔心之際，拍片嘅事主事後亦有補充，表示當時已有空服員上前制止該名大叔嘅缺德行為。不過，有部分網民就化身偵探，猜測事件背後係咪「事出必有因」，估計可能係前座乘客喺用餐時間未有校直椅背，大叔先用呢種方法「報復」。但大部分留言都認為，就算有任何不滿，都應該直接向空服員求助，而唔係喺密閉空間作出如此滋擾其他乘客嘅嘔心行為，做法絕對唔可以接受！