【自助餐放蛇起底組】15款甜品任食! $68不限時狂𩟔拿破崙、榴槤炸彈
廣告
日式放題就食得多啦,今次就帶大家搵 甜品任食 下午茶啦!呢間餐廳喺觀塘工廈,位置都唔係話好易搵,但最近收到風話$68就有15款 甜品任食 ,仲要無限時、唔使加一,咁抵就梗係要試下佢係咩料啦!
15款 甜品任食擺盤有心機
甜品款式有15款,糕點類包括有黑森林、藍莓芝士蛋糕、綠茶紅豆慕絲餅、黑芝麻豆腐芝士餅,另外仲有焦糖燉蛋、牛乳布甸等,算係幾多種類。而且可以食足兩個半鐘,每人仲有一杯嘢飲選擇,價錢$68簡直係平啦。味道方面都唔係話太差,某幾款甜品好似沙加餅、泡芙等都幾好味,兼且甜品擺盤好有心機,唔係求求其其放喺隻碟上,任食都好有心機去整,Feel到餐廳嘅用心,加分!
嗌甜品同平時食放題一樣,都係用Order紙寫返份量,寫完之後幾分鐘甜品就黎到,速度夠哂快。
糕點類:選擇多 細細件試多幾款
食得自助餐,梗係試多幾款唔同食物啦,所以呢度的甜品細細件,絕對係優點!黑森林、藍莓芝士蛋糕⋯⋯仲有綠茶紅豆慕絲餅、黑芝麻豆腐芝士餅等嘅特色糕點,味道亦唔差,睇得出師傅用心製作。
杯裝類甜品:香脆焦糖燉蛋 熱辣辣麵包布甸
除咗蛋糕類,仲有啲杯裝類甜品,好似牛奶布甸、焦糖燉蛋等,麵包布甸仲係熱辣辣整出黎!
其他特色甜品: 爆漿榴槤炸彈
最吸引嘅就係榴槤炸彈,未開始食已經好期待。上碟嘅時候係啱啱炸起,一切開有超多榴槤漿!另外仲有士多啤梨類嘅甜品都唔錯。
環境舒適 每人一杯飲品
甜品就任食,但飲品就每人只得一杯,但佢有花茶可以選擇,都叫交足功課。
總結:$68可以任食15款甜品仲包一杯飲品超級平,甜品味道雖然唔係話特別好食,但某幾種好似朱古力沙加餅、士多啤梨泡芙、榴槤炸彈等真心正,榴槤炸彈咁多餡都可以任食,夠哂抵!另外甜品擺盤靚,睇得出餐廳好有心機。服務亦好好,不時會過來問下我地使唔使加單。環境舒適唔會逼,整體相當唔錯。
分數:7/10
Go Inside Kitchen
地址:觀塘觀塘道404號時運工業大廈5樓D室 (顯示地圖)
電話:3152 3533
$68下午茶時段:3pm-5:30pm
用餐時間:無限時
香港18區美食有甚麼推介?
新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。