安徽笨賊學電影垂降盜竊！失手被困半空2小時 結局神反轉勁尷尬！

蜘蛛俠上身學電影垂降盜竊反出事

事發喺4月11日，安徽南陵一名姓錢男子，唔知係咪睇得太多《Mission Impossible》，竟然諗住用繩索由一棟公司大樓嘅天台游繩而下，再由窗戶潛入室內大格鬥。佢嘅計劃聽落天衣無縫，點知一開始行動就出事！因為操作失誤，佢成個人就咁被吊喺半空中，上唔到又落唔到，情況極度狼狽。

驚死半天吊兩粒鐘竟報警自首求救

呢位「蜘蛛俠」就咁被掛喺外牆足足2個鐘，全程動彈不得。隨住時間一分一秒過去，佢開始驚體力不支會跌死，喺生死關頭，求生欲戰勝一切，佢竟然選擇打電話報警自首求救！從網上瘋傳嘅影片可見，消防員接報到場後，喺天台合力將條繩拉返上嚟，成功將佢救返上安全位置。

獲救即被捕收場後悔稱以後會做好人

呢位錢姓男子一獲救，成個人即刻癱軟喺地，睇嚟真係嚇到腳軟。不過佢唔使旨意可以走人，因為警方早已恭候多時，佢一落地就即刻因為盜竊罪被捕。呢位笨賊事後亦非常後悔，對住鏡頭大呻：「經歷過這麼個事情，以後要好好的。」想做個好人，但睇嚟都要先接受法律嘅制裁，真係賊仔唔易做！