正義女神｜施焯日童顏演14歲殺人犯零違和！真實年齡曝光嚇窒網民
施焯日法庭戲眼神殺逼哭觀眾
施焯日喺《正義女神》最新一集嘅屋苑刀砍姊妹案中，施焯日飾演嘅姚振銘自稱砍傷咗姊姊同妹妹，但真相原來係為咗保護患有思覺失調嘅家姐。當佘詩曼飾演嘅言惠知用激將法逼佢講出真相時，施焯日全程雙眼通紅，不斷搖頭表示「你收聲，唔係呀」，最後忍不住激動拍枱。佢講出真相嗰一刻，雙眼通紅落淚痛心咁話「其實家姐讀書好大壓力，佢唔敢同阿爸講，佢唔想阿爸失望」、「家姐一定好辛苦」，嗰種依然從未怪過家姐嘅姊弟情真係令人動容到爆燈！
鍾澍佳曾經鬧到狗血淋頭
在接受TVB獨家訪問時坦承，法庭場口對佢嚟講挑戰超大，「因為今次嘅演繹冇好多對白，要用眼神同肢體令觀眾明白，所以都花咗好多功夫去準備，我都睇咗好多少年犯犯案嘅心理狀態，之後就不停幫自己做心理建設，令自己用三個星期嘅時間進入角色」。佢更爆料話最初第一次演畀總監製鍾澍佳睇時，表現不理想被鬧到「狗血淋頭」，「因為可能個肢體同眼神仍然都係做得唔夠，所以就不停咁加強呢兩樣嘢」。因此佢喺拍攝前壓力超大，連續三星期嘅情緒都好壓抑，睡得好差。
佘詩曼現場提供安心環境
施焯日大讚佘詩曼同鍾澍佳喺現場提供咗一個令佢好放心嘅環境，「等我可以盡情咁釋放自己，同埋阿佘好信任我做得到，畀到我有多啲信心」。呢種專業嘅合作態度，令佢可以完全投入角色，將姚振銘嗰種長期壓抑、對親情嘅畸形執著，以及犯案後嘅掙扎演繹得震撼人心。佢憑住充滿防備與絕望嘅眼神，加上細膩嘅微表情，成功演活咗未成年罪犯嘅無助與偏執，強大嘅感染力帶領觀眾深深體會角色內心嘅扭曲與悲哀。
26歲童顏演14歲零違和感
如此童顏的施焯日原來今年已經26歲，演繹未成年少年犯竟然「零違和」，眉宇間依然保留住一份幼嫩及稚氣，令不少觀眾感嘆「氣質真係好似未成年」。佢之前喺《巨塔之后》時已經笑指，不少幕後同事真係以為佢只有18歲，「無論係幕後同埋化妝整頭嘅同事，大家都以為我得18歲」。問到呢副「童顏」係好係壞，Arthur笑言好處係容易得到別人友善對待，「大家都會當我係細佬、對我好親切」。不過為咗擺脫「童顏」嘅限制，佢坦言私下有落力操fit自己，「我有Keep住健身，一直都有前輩同導演鼓勵我去健身，我都希望自己大隻咗嘅話、可以喺演戲方面有多啲可能性」。
網民激讚演技升呢
施焯日喺《正義女神》嘅出色表現獲得網民一致好評，留言區充滿讚賞聲音，「佢做得好好」、「佢叫咩名呀？」、「佢演到嗰種內心戲」、「尋日睇到佢雙眼好似真係有情緒病咁勁」。有網民更讚佢「本身好靚仔，連續兩日啲配角都搶晒鏡」，仲有人話「呢個正義女神發掘出好多有演戲天份極高新一代，希望將來能看到各新一代有不同發揮機會」。對比起早期嘅演出，Arthur喺《正義女神》中處理角色複雜嘅心理轉折上顯得更加成熟，成功彌補咗以往嘅不足，讓觀眾見證咗佢作為演員嘅蛻變。
從訓練班到實力派演員
參加2019年TVB訓練班入行嘅施焯日，喺2020年《星空下的仁醫》中演患罕有病病人「星仔」受盡好評，之後喺《巨塔之后》再演患罕有病病人，表現同樣亮眼令人關注。翻查資料，佢過往已多次被監製相中飾演青少年角色，先後喺《欺詐劇團》、《星空下的仁醫》、《執法者們》、《巨塔之后》和《新聞女王2》中都有出色表現，當中喺《星空下》及《巨塔》飾演嘅病危青年更成功狂派洋蔥。呢幾年間佢嘅「青年樣」近乎冇「長大」，稚氣依舊，但演技就不斷進步，今次喺《正義女神》嘅表現更係達到新高峰，證明佢已經由新人蛻變成實力派演員！
將來還有什麼演唱會值得留意？
有不少歌手宣布舉辦演唱會，小編為你整合了香港演唱會2025一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
