油塘疑現「美女黨」出沒呃錢 專向1類人索錢 正義街坊拍片追擊獲大讚

油塘疑現「美女黨」出沒呃錢

昨日（19日）有網民在Facebook群組「油塘人之家 Home of Yau-Tonger」發布多段追擊區內「美女黨」的影片，樓主在帖文中表示：「KK園入侵油塘，真係忍唔住！」。片中見到，1名濃妝艷抹、身穿黑色透視喱士配搭胸圍式上衣的性感長髮女子，在街頭走向數名男士，疑似以各種理由索錢。

拍片者隨後走向該女子並厲聲質問：「錄咗好多個㗎啦，唔使遮㗎啦，我錄咗你好耐㗎啦。」女子以手遮面不發一言，急步前行打算逃離現場，惟拍片者繼續追擊說：「你係咪見男人就問男人攞錢㗎啦，我前後已經見到你攞咗5、6個㗎啦。」女子繼續遮面，拍片者再追問：「點解你會係油塘周圍問人攞錢嘅呢？你係咪蕩失路？係咪唔見咗銀包呀？」女子這時以普通話提到「警察」，拍片者回應：「唔緊要，警察嚟緊㗎啦。」女子回答：「警察來我就走。」拍片者續指：「唔緊要，唔使走，你都周圍問人攞錢囉。」

街坊瘋狂追擊：你係咪怕醜呀

期間女子一度出手攔阻鏡頭，要求拍片者停止拍攝：「把這個手機關了，警察來，我在這邊等，你把這個關了！」拍片者表示：「好呀，你等呀，你係到等呀。」此時，女子惱羞成怒囂張地說：「你沒有權力拍我！」拍片者反駁：「有呀，香港無肖像權㗎，你明唔明呀？其實你咁樣問人哋攞錢呢，你係咪需要幫忙呀？」女子否認索錢行為：「我什麼時候拿男人錢？」隨後轉身急步走，並以手遮面，拍片者繼續追問：「點解你揀油塘既，小姐，你點稱呼呀？」女子不再出聲，只以手遮擋鏡頭並尋路前進，拍片者大聲質問：「你係咪怕醜，怕醜你又周圍問人攞錢嘅，我見到你不下問咗5、6個囉喎。」就在這時，女子突然轉身拔腿狂奔，迅速跑離現場，影片至此結束。

網民大讚拍片者 呼籲小心安全

大讚拍片者見義勇為

不少網民稱讚拍攝者勇敢，批評「美女黨」性感透視裝引人遐想，懷疑其動機不純：「流鶯？」、「著到咁，似…」、「直接落廟街做啦」。

呼籲報警處理

亦有網民建議報警而非私自追擊，提醒「美女黨」可能有同夥，拍攝需注意安全：「樓主真係要安全情况下拍，怕有同黨攻擊，安全至上」、「不過大家見到呢D乞衣都係小心D，有時佢地離遠會有D男同黨跟住睇住，有乜事可能會出嚟幫拖」。

譴責「美女黨」行騙行為

批評「美女黨」以騙術索錢，助長不良風氣，危害社會：「不知廉恥」、「好多呀伯寧願比完之後，自己慳餐死…就害死香港了，所以越來越多各式手法呃錢專才」、「騙子真多」