【大坑】京都十二道風味 居酒屋會席料理

懷石料理在香港早已見慣見熟，實在有點悶。最近有新居酒屋進駐大坑，主打與「懷石料理」相近的「會席料理」。老闆親自設計由前菜到甜品共12道菜的會席料理，以不同的食材和部位入饌。菜式講求不時不食，全由日本空運到港的海鮮為主。以矜貴的吞拿魚腦天、拖羅和頰肉作刺身，腦天即是頭頂肉，口感柔軟滑溜；拖羅用上魚腩最底部位，一咬滿口魚油多到滿瀉；頰肉混入岩鹽、葱及麻油，食落爽口像生牛肉。還有白蝦細工壽司，廿多隻細小白蝦砌成花包著飯糰，啖啖清甜蝦肉，膠質豐富。煮物是京都傳統湯葉饅頭，以腐皮包著雞肉及銀杏，湯汁濃而不膩，每日來貨十多個極珍貴。炸物以原條游水活香魚炸成天婦羅，脆到連骨都食埋！雖然晚市只供應一款會席料理，每位$680，但Menu 每星期就換一次，保證次次都有驚喜。