狙擊八月十五 行家海外賞月奇趣錄@杜遊珍
廣告
中秋又到， 留港享受人月團圓，絕對係天理，但不幸行家少不免會在此期間受命出差，如旅行社公關Ｐ，早幾年每逢中秋，都要陪老細返大陸石窟賞月，行禮如儀無厘新意，仲要應酬老細同埋旅遊局，年年月餅食之無味。不過又未必個個都咁灰嘅，今期同大家分享海外賞月行。
外國人食月餅 「呢啲嘢，我唔會再試！」
為了在外地營造中秋氣氛，你可以去到幾盡？自備月餅與燈籠是基本吧！旅遊達人J幾乎年年在外過節，次次都帶月餅與當地人分享， 雖然將mooncake 解作「類似cheesecake 」大家都好快明，但食落就未必個個都鍾意！有次為了請巴黎朋友食，J特登去當地超市入了
40歐一盒（每個要一嚿水港紙！），全部都畀面吃一小口就算，咁又係，甜蓮蓉加鹹蛋黃，很難吃得慣吧，有位直率的巴黎人更食都未食就狠評月餅是臭的， 耍手又拎頭！但亦有加拿大朋友極賞識，送一個雙黃蓮蓉給他，由於無講清楚月餅是大家分來吃的，他竟然獨食全個，攪到食滯咗！
豬油亂派好尷尬 送月餅要留神
另一位記者K亦有過節請食餅的習慣，但卻令佢嚇餐懵！話說那次去伊朗， 由於當地人酷愛野餐，午後小休時有此機會，K與同行行家便將
月餅分成四份，請埋當地導遊與司機食，點知見司機食落面有難色，明顯唔鍾意，她才記起──月餅裡有！豬！油！雖知當地的伊斯蘭教徒
視豬肉為不潔之物，屬禁用品，亦打死都唔會食，同行行家見K大叫都即刻知瀨嘢，惟有用廣東話話不知者不罪嘅，最後他們都沒有說
破，只跟司機說，不喜歡別勉強。此事令K以後都記住， 送月餅一定要睇成分，搞到人家無故破戒，盞好心做壞事！
