走進澳門魔幻世界@Travel佳
就到聖誕，就到聖誕！有假放梗係要搵機會逃出香港啦。不過計我Travel佳話，「出走」唔一定要去到老遠嘅，去個近近地個個都以為熟到爛嘅地方，但都可以睇到同試到一啲令人WOW一聲嘅嘢，仲要係抵嘅，先算得上係「旅遊大師傅」！講起上嚟，澳門新濠影滙嘅「魔幻間」都算係我嘅新發現，絕對滿足到以上嘅要求！佢8月先開幕，相信仲未有太多人知道佢嘅好玩之處， 就等我同大家開心些牙下啦。
首先佢點抵法呢？平時我哋畀一份錢去睇一個魔術Show，最多咪就係一兩個魔術師同你玩番幾場小型魔術咁囉。但今次，我睇足3個劇院嘅表演，淨係魔術師我都見到4個！
之後觀眾會被分成一半輪流去唔同嘅劇院，我嗰日先去「魅影劇院」，見到第2個魔術師，表演係點嘅我唔多講喇，只能夠話個魔術師滿足晒所有我對魔術師嘅幻想，就係靚仔同chok，仲要chok得好睇，我身旁嘅女士真係睇得好陶醉。
魔術師靚仔可能都係技巧之一，你掛住望佢咪會分心囉，話咁快佢又變咗成堆金魚出嚟喇。
之後我去到「古堡劇院」，見到第3對魔術師，係對夫婦嚟。睇住佢哋談談情，變變魔術，又畀佢哋邀請出嚟助興下咁，歡樂嘅時光好快就過。
望住男魔術師刀鋸太太嘅一幕，真係唔到我唔信要做魔術師背後嘅女人，係需要相當勇氣架。
最後，壓軸登場嘅就係我期待已久嘅「大師魔法劇院」喇。當日表演嘅係「魔幻間」嘅創作總監Franz Harary，佢曾經變走過獅身人面像、泰姬陵同穿梭機！果然，睇呢個Show你會以為自己睇緊真人版電腦特技。有勁歌熱舞、有美女、加上唔同燈效已經夠精彩，仲要個個魔術都唔小嘢。
一架車就係咁係大家面前變出嚟！中間唔知有冇幾秒！
Franz Harary將自己鎖喺個箱入面然後放火，雖然知道佢最終會成功逃脫，但就係會忍唔住好緊張。類似嘅場面有好多，話時話大魔術師係咪都有鋪自虐癮呢？
講住咁多先，魔術嘅野都係睇咗先知有幾魔幻！總而言之，我呢個澳門之旅，唔單止escape from hk，即頭係escape from reality！
魔幻間
地址：澳門新濠影滙2樓
免付費電話：800 900 783
