觀塘tufting手作地氈工作坊 記者試玩！無限時任整＋DIY圖案

觀塘tufting手作地氈工作坊 記者試玩！無限時任整＋DIY圖案

Tufting熱潮最近席捲香港，坊間出現形形式式嘅工作坊，觀塘新開嘅QQ Tufting由一對情侶Sharon及Adam打理，主打毛毛地氈工作坊，亦可以整成鏡、坐毯及杯墊等物件，基本上任何圖案都可以挑戰，最緊要有心思整就得！呢度最大賣點係一個價錢無限時任玩，最平$600就可以整足12小時，平均除返開每小時都只係$50，相當抵玩，完美主義者就唔驚俾人催住走，可以慢慢整到靚靚仔仔先走！

尺寸分別有3款，包括50 x 50、80 x 80及90 x 90cm，整個過程大約4-10小時不等，時間會隨住圖案大小以及複雜嘅程度遞增，店主Sharon表示唔少客人喺度整足12個鐘頭都唔捨得走！

專人指導新手輕鬆上路 必學6大步驟逐個睇

第1步.起稿勾線

第一步先選擇心水圖案，上至寵物人像，下至生活物件，任何事物都可以作為地氈圖案嘅靈感。首先使用投影機將圖案投射於布料上，然後就可以用麥克筆勾勒線條起稿，即使唔太識得繪畫都無問題，可以隨時搵專人協助。

第2步.揀毛冷

第二步可以選擇相應顏色嘅毛冷或者自由發揮，毛冷顏色多達60款，質地以粗身為主。

第3步.練習使用地氈槍

準備好工具就會進入練習用地氈槍嘅環節，導師會教授幾個基本技巧，包括直線、曲線及填色。不過大家緊記最重要一點，永遠用地氈槍嘅時候都只可以由下而上打！同埋打曲線嘅時候可以逐少逐少打上去，先會令個彎位更完美，所以千祈唔好心急！

第4步.開始製作

練習完便可以正式開始了！記者建議可以先落手打圖案嘅線條，之後再用直打嘅方法將空位慢慢填色。記者初頭拎支槍上手覺得無想像中咁重，只之不過長時間拎住都會幾攰下，加上用地氈槍時都要借身體嘅力壓穿布料，幾個鐘頭無間斷咁整都會好辛苦，所以都可以俾自己間唔中抖下！

第5步. 黏合地氈

歷時4小時記者終於完成整個圖案，走入最後直路！傳統黏合地氈都會使用白膠漿，但要等足幾個鐘甚至全日風乾，往往都無得即時帶走作品。所以呢度另一個特別之處，就係使用蒸氣熱溶膠布去做黏合，風乾嘅時間連5分鐘都唔使，超級方便！

第6步.剃毛修剪

最後一個步驟就係裁剪地氈形狀，再將多餘嘅毛剃走，想力求完美仲可以用鉸剪修葺圖案細節位。如果想送俾人或者掛喺屋企做裝飾，都可以搵店主幫手做額外精修，價錢由$200起，視乎複雜程度，可以令圖案更為立體及精細！

QQ Tufting

• 地址：觀塘駱駝漆大廈一座（詳細地址可向店家查詢）
• 時間：12nn-12mn
• 價錢：$600（50 x 50cm）、$800（80 x 80cm）、$1000（90 x 90cm）
• 額外收費：二人一框加$150、超過凌晨12時加$100／小時、精修服務$200起
• 電話：6972 3118
• Instagram專頁：＠qqtuftinghk