3間大阪就算排幾耐隊都要試嘅章魚燒

根據非正式統計，大阪嘅便利店加加埋埋應該都唔會夠街邊章魚燒多！喺大阪真係每隔幾步就會有間章魚燒店喺你隔離，淨係喺道頓堀同難波中間已經有唔知幾多百間，仲密過7-11。想間間都試匀基本上真係無咩可能，一來章魚燒無得逐粒買，二來好多章魚燒都咁鬼大粒，幾大食都會好快飽。所以就算係呢啲街邊小食都要做定功課，重點出擊，淨係揀最好食嗰幾間！

「有腳嘅章魚燒」たこ家道頓堀くくる

有去過道頓堀嘅話，都應該會記得嗰度有好多超大型嘅食店招牌，例如有蟹、河豚、壽司，同埋呢間永遠都成班喺一隻巨型八爪魚下面排隊嘅章魚燒店，くくる。不過呢度唔係淨係得個招牌夠大，最吸引嘅係啲章魚燒粒粒都有腳架！因為店家用料超足，塞到每粒章魚燒都差唔多爆咁款，咁勁嘅份量絕對係其他店一定比唔上！

傳說中有腳嘅章魚燒，真係似原條八爪魚腳就咁放落去燒。

たこ家道頓堀くくる 本店
地址：大阪市中央区道頓堀1-10-5　白亜ビル1階

「大阪人氣No.1」Wanaka

能夠喺大阪呢個章魚燒戰場上成為人氣第一，就梗係有佢嘅賣點啦！好多人都話Wanaka嘅章魚燒誇張到食一次就會上癮，唔單止佢每粒章魚燒都落足料有勁大塊章魚，而且咬落外面脆口，入面又keep住好creamy嘅口感，再配埋Wanaka特製醬汁，果然係大阪人最自豪嘅味道！呢度仲有幾款原創口味章魚燒一樣係必試！

經典原創章魚燒配特製醬汁，有4種口味。

OOIRI（大份量），包括「醬汁、醬油、鹽蔥」3種基本口味嘅章魚燒，再加一款時令期間限定口味，總共4種口味。

Wanaka (わなか 千日前本店)
地址：大阪市中央区難波千日前11-19

「每日新鮮章魚直送」章魚燒十八番 道頓堀店

章魚燒十八番一直講求用料要新鮮，所以堅持只用每日會由批發市場送過嚟嘅新鮮章魚。除此之外，呢度嘅章魚燒麵團係用牛奶同自家製食譜製成，再加上櫻花蝦、生薑同炸麵衣等嘅食材，令到啲章魚燒食落嘅口感同味道都好特別，所以同樣都係排隊排到傻嘅人氣章魚燒店！

每粒章魚燒外型睇落有啲似米通咁一粒一粒包住。

原來係因為過程中會加入大量櫻花蝦、生薑同炸麵衣，令到每粒章魚燒咬落都非常脆口。

章魚燒十八番 道頓堀店
地址：大阪市中央区道頓堀1-7-21

章魚燒貴為大阪代表名物之一，去到唔食返三五七間真係唔好話自己去過大阪！依家喺網上成功申請指定渣打信用卡，就有機會贏取HK$5,000旅遊禮券，請你飛去大阪日日食章魚燒（不過返到香港應該成個月都唔想再食八爪魚）。
立即申請

圖片來源：EnjoyJapan、痞客邦@熊喵、tsunagu Japan