51歲李婉華網上節目大受好評戲癮發隨時返港拍劇

Mar 12 2020

當年嫁去加拿大相夫教子退出香港娛樂圈的李婉華，近年開始蠢蠢欲動搞作多多，除了在電台做主持多年，她一口氣開咗Youtube頻道、Facebook Page，加埋之前已經開嘅IG，開通各大網絡平台與外界 connect，仲學人做直播又拍片做網上節目。 51歲的李婉華唔止keep住火辣身材，原來對幕前工作仲有團火，戲癮大發的她心思思想拍港劇，據知已有電視台向她招手兼密斟，日前她在其網上節目《住加女人－CanWomen》，訪問港台電視節目《頭條新聞》主持人吳志森，更口頭應承參演其中一角。一代女神回歸，觀眾一定好想睇。

撰文、圖片：東方新地

李婉華做youtuber受歡迎戲癮發隨時返港拍劇

本來修心養性做人母的李婉華，近年因為戲癮大發，再加上三個仔女都開始長大，大女17歲，一對孖仔亦11 歲，可以作有限度工作，而近年她在溫哥華為中文電台AM1470主持節目《小心華之里》，經常有香港藝人受邀上其節目做訪問，更加令她蠢蠢欲動。

03年婚後幾乎絕跡香港的李婉華，近年不時返港露面，靚樣與弗爆身材依然，51歲凍齡有術。

婚後移居溫哥華多年的李婉華，最近全面開通account，更拍片及主持做直播節目，她表示因為網絡世界可以暢所欲言，她亦與時並進。

據知情者透露：「Anita（李婉華）婚後將家庭放第一位，近年佢見仔女開始可以照顧自己，老公亦開綠燈，佢先活躍起嚟。早前開始學做youtuber，口齒伶俐嘅佢一啲都冇生疏，製作嘅節目亦好受歡迎，香港有幾間電視台知道佢有意再做幕前工作，已經向佢招手，不過Anita話大前提係唔要長時間唔要困身，因為對孖仔始終仲要人照顧，近年港台成日都開劇，佢老友鄭敬基亦拍唔少，所以佢都好有興趣，另外無綫亦都對佢虎視眈眈，如果佢肯再拍劇一定有好大回響。」

李婉華早前在自己的網上頻道請來在港台節目《頭條新聞》中分飾「太后」、「大帥」等角色的吳志森做嘉賓，講到該節目只有男主持，女性欠奉，吳志森邀請李婉華加入演出「宮女」一角，李婉華在鏡頭前笑答︰「好呀﹗有機會就給我試，讓我做宮女，服侍一下你們。」

老友鄭敬基力持回歸盼《卡拉屋企》演員再合作

對於李婉華有意回歸拍港劇，鄭敬基表示未知是否成事：「我成日都同婉華有保持聯絡嘅，但仲未收到佢返來拍劇嘅消息。如果港台搵佢客串我真係唔知，可能佢對香港有個情意結，真係都唔出奇，港台拍嘅劇通常都係短時間，佢可能就啱時間，個幾兩個月前佢先返嚟香港，不過依家又有疫情，我估短期內未必會喇！作為一個識咗咁耐嘅好朋友，佢做咩決定我都會支持佢。」鄭敬基笑言最想與李婉華、盧苑茵及黎海珊等《卡拉屋企》演員再合作，而《卡拉屋企》是香港人其中一個集體回憶，集氣可能事成呢！