YouTuber馬田直線抽擊！隔空逐點回應文苑總監電台發言

相關文章：百萬YouTuber馬田出片為「有啖好食」澄清：好大部分人都係無辜

馬田逐點反擊文苑總監電台言論

馬田與文苑飯莊的風波在昨晚有進一步發展，「點cook guide」的最新上載影片中，馬田首先播放早前文苑總監CK Poon，在商業電台雷霆881《在晴朗的一天出發》中對事件的解話，然後再逐點反擊，下文列6點歸納雙方的說法！

1.文苑總監指馬田預約時訂房用餐

文苑總監在節目中表示馬田在預約時預訂了房間，馬田則在影片中公開與餐廳用餐預訂的對話紀錄，從對話可見馬田並沒有要求VIP房，他亦表示餐廳預約時的WhatsApp回應不足，「同啲食評網講嘅一樣，十問九唔應」。

2.文苑總監：一對老人家及後生仔，喺晚市時間好奇怪

文苑總監又表示當晚有侍應向他反映「一間房裡面唔畀伙記入去，閂門要㩒鐘入去，有一對後生仔女，一對老人家，又冇任何order，又冇任何指引畀我哋，原來知道係一個Foodie，我哋會擔心裡面唔知發生緊咩事」，指認為在晚市時間一對老人家及一對後生仔的組合十分奇怪！馬田就十分驚愕地直言，「我想知道呢個世界，有咩餐廳嘅晚市，係冇老人家同冇後生仔㗎？」

3.文苑總監：冇任何order，擔心裡面唔知發生緊咩事

馬田在影片中亦自認當日大遲到，所以一開始未齊人，只有3個人在房間，「你將4個人嘅訂枱放入VIP房，入面得3個人，邏輯會諗到啲咩？有人遲到囉，咪就係咁簡單，佢哋遲到未嗌嘢囉」，另外，他亦指餐廳未有提及有問題，如果有問題，可以先點能夠放久一點的菜。

4.文苑總監：佢哋閂晒門要侍應撳鐘先入得去

文苑總監指馬田4人在緊閉房門要他們按鈴才允許侍應進入，馬田公開錄音回應指是餐廳侍應關門，而且在按鈴後等待十多秒都沒有人，要馬田自己開門找人，他認為米芝蓮推介餐廳的服務不應如此。

5.文苑總監：Set晒相機腳架鏡頭影響到人

文苑總監在節目指出擔心馬田設定相機、腳架、鏡頭等會影響到其他食客，又說每一晚招呼的客人有150至180位，「地方非常之大有8000呎，客人嚟到餐廳所有嘢都係要顧及嘅，包括食物、服務、安全，所以呢一方面我哋會睇得仔細啲。」馬田在影片中展示出當日帶去文苑拍攝的器材，可見只有一部相機和一支小型腳架，似乎對安全問題沒有甚麼值得疑慮，馬田媽更提出質疑，「喺出面廳影就會影響到人，喺我間房影自己點會影響到人呢」。另外，馬田亦在新片中嘲諷當晚文苑根本只有幾枱客人，「嗰一日5枱客，現場所有人每人一人一張枱，佢都坐唔滿！」

6.文苑總監：無任歡迎拍嘢

文苑總監在節目中表示自己無任歡迎到餐廳拍攝享用美食，但在錄音中可以清晰聽到當時總監指，「唔可以畀你咁做，呢度係一個餐廳地方。」，在馬田欲介紹自己及說明拍片目的時，就打斷他的話句，隨後亦放下卡片就離去，十分不禮貌。

馬田：呢間餐廳係好食嘅，只不過唔係我入去會好食姐

文苑總監在節目中亦強調，「所有Foodie嚟，佢哋都要畀錢」，又指今次事件涉及的兩位Foodie都是自費，又指會讓Foodie客人提早到現場用餐，拍攝廚師煮食現場，稱食物質素都是「一視同仁」。在馬田新片的尾聲，他就說「到呢一刻，今時今日呢一秒，我都依然相信呢間餐廳係好食嘅，只不過唔係我入去會好食姐」，認為觀眾可以嘗試搏一搏！

網民瘋湧餐廳社交媒體留言

影片上載後已達27萬人次觀看，而事件發酵至今，網民對餐廳的信任度大減，更紛紛到餐廳的社交媒體留言，「羅生門之後營運總監唔救火都不特止仲要上電台火上加油，聽完個電台更加認為你地本身嘅嘢唔會好食」、「你好，想約下星期黎拍野，麻煩安排下，同埋準備埋道具單」、「兩位後生仔女同兩位老人家食飯好可疑」、「你哋仲要打電話上去屈馬田佢哋大牌，想知你哋幾時回應吓」另外，在openrice上，有網民留下對文苑飯莊的差評，「營運總監亦態度傲慢，食店階級觀念比較重，價錢亦較離地價格，已嚇怕天馬苑所有街坊」。