觀塘粵菜餐廳驚現戚家十三口慘案 網民笑：清明節聚餐

觀塘餐廳盞鬼菜式：瀨尿蝦上樹

有食客在觀塘「龍記小廚」用餐後，嬲爆在網上指要發文紀錄這間難食到爆的餐廳，師傅原是「海悠」的前師傅，自己出來自立門戶，因此心想「點都有啲保證」，但吃到該店名菜「瀨尿蝦上樹」時，指「細隻肉少無味夾肉梅都算，仲要好有信心咁話擺得好靚可打卡，一出到嚟⋯⋯小喇叭。我只可以講呢碟野應該叫做戚家十三口慘案！」另外，食客亦在文中大鬧另一道菜，「仲有個墓碑炒飯，真係癲！」在帖文的圖片中看到有幾隻瀨尿蝦被放在作擺設的樹上，其餘瀨尿蝦就被逐隻吊在樹枝上，認真盞鬼，另一道炒飯的圓牌連同下方的木板，亦確實神似墓碑！

網民：似唐伯虎點秋香呢一幕

網民看到菜式的賣相都紛紛笑爆嘴，更認為瀨尿蝦被吊的一幕與電影《唐伯虎點秋香》中，唐伯虎的8位娘子同時上吊一幕十分相似，「八件一齊吊，何其壯觀」，有網民就覺得與《新警察故事》成龍的兄弟被吊起一幕也非常相像！而另一道墓碑炒飯就有網民指「好似耶穌復活墓碑門口舊石」、「成個招牌拆咗出嚟炒飯!! 誠意十足」。

此外，從該餐廳在Openrice的食評中 ，可見有食客對師傅的創意擺盤留下差評。