上海菜餐廳4大1小照收5位茶錢 港媽為$6嬲爆！侍應咁解釋
港媽去上海餐廳食飯、4大1小照收5位茶錢
港媽當日與家人去到太古康怡的上海姥姥吃晚飯，人數是4位大人再加港媽的1歲女兒，總共4大1小。港媽指，當日入座時她本身想坐4人梳化位，但其中一位侍應叫她坐5人梳化位，會坐得比較舒服。當他們一行人在5人梳化位坐好時，侍應就收走了一套餐具，港媽就安排女兒坐梳化而不坐BB椅，期間女兒「無用過/食過任何佢哋嘅嘢」。
港媽為$6嬲爆投訴、侍應解釋：你坐5人枱
到埋單時，港媽發現餐廳竟收了5個人的茶錢，覺得非常奇怪，認為不應該收取1歲女兒的茶錢，於是向職員查詢，職員回答指「因為你哋坐5人枱」，所以收5人茶錢，港媽則認為「bb又冇用佢嘅嘢，點解要收」，因此覺得不忿，心想「咁如果下次3個大人，坐2人枱，係咪收2人茶錢」。於是就把事件放上Facebook群組和網民分享。
網民分2派：嘲諷樓主「幾蚊都要公審」
網民在這件事上分成2派意見，有網民認為港媽「幾蚊都要公審」的行為實在太肉酸：「出得街食飯唔好咁肉酸啦，為咗個茶位錢喺度公審，想慳錢咁咪唔好帶你個女出街囉，人哋打開門做生意都要交租㗎嘛！」、「你個女唔係人？唔飲唔食坐人個位你覺得冇嘢？食餐飯幾蚊都計得咁辛苦，你都係返屋企煮喇」、「按人頭收費非常合理，如果有最低消費，收你五人錢也正常」，更開始攻擊港媽的低消費能力「4個大人食5個餸(輕盈)加個粗炒都咁肉赤，佢都係返屋企煮淨麵食吧啦」。
撐樓主：1歲都收錢係過份咗、冇用餐廳啲嘢唔應該收茶錢
不過也有網民明白港媽的執著之處，認為「俾得起$6，但唔識分合唔合理」，指出「廿零蚊，不算什麼
如果小孩有入座開位，理應付$，但淨係比張櫈佢坐，冇擺位，收$就不合理」；也有網民指出「1歲都收錢喺過份咗」、「支持樓主，不明文規定，BB係唔收茶錢的」、「理論上茶錢係計有冇開茶位，如果冇開應該唔收」，認為餐廳沒有為樓主的女兒準備BB椅，餐具又收走了，BB又不會喝茶，不應收茶錢，更指餐廳「為咗六蚊，一間食店真係可以幾短視」。
中立網民：下次問清楚先啦
不過也有網民保持中立，指出入座前問清楚就可以避免爭拗：「做生意，佔座收費無可厚非，入座前可先了解 才考慮會否光顧」、「假設冇講xx歲以下小朋友免費，就照收錢㗎啦，你話冇食嘢，佢話你有食，又係口同鼻拗」、「如果你真係好計較收茶位錢，咁下次你食飯前問定囉！」、「問題不是應不應該收，而係收之前應該講清楚，明碼實價。如果你講明大肚婆要當2個人計算，完全冇問題。只不過人哋有權唔揀你」。
