牛角客趁優惠狂叫食淨成枱肉 老闆黃傑龍力撐員工：照罰！

牛角有食客食淨多盤肉 員工無奈：最後錯嘅都係職員

近日牛角正在進行$288/2位的優惠價，有不少港人襯優惠到店一嚐燒肉，不過近日有網民投稿到Facebook專頁「西店Hi客之道 Hispitality Secret」，指自己在非繁忙時間光顧牛角，發現鄰桌食客付款離去後，桌面上「食剩十幾碟冇燒過嘅肉，仲要每碟肉都係一疊疊 」，圖中可見有不少生牛肉和生豬肉，份量頗多。投稿人見此等情況，就在男店員到來收拾時，問他有沒有對該桌客人罰款，結果店員無奈地說；「冇得罰嫁，罰完佢一陣又同公司投訴番佢態度差，最後錯嘅都係職員。」投稿人表示自己也是打工仔，非常明白男店員的無奈，並怒斥：「食剩小小一兩碟我覺得情有可原，但呢枱野剩得會唔會太過份？」，又指該桌食客「人地做優惠你係咪要食到人地間餐廳執笠？剩咁多真係唔覺折墮咩？」

投稿很快就引起大量網民熱議，紛紛憤怒指責該桌客人「真係好X嘥嘢，唔只唔環保，仲係冇同理心，冇家教！」、「食唔到又叫咁多係度擺」、「下世仲比佢做人？落地獄做餓鬼啦」，有網民同情該位店員，估計他曾經因為罰款被客人投訴，又指「講真我係打工仔就唔會理，一係就問經理點，西客太多，自己真唔敢去同客人講要罰錢」。

黃傑龍撐員工：鼓勵同事執行罰款！

事件引起老闆黃傑龍注意，並轉發分享感受。他在帖文中憶述牛角的惜食方案「紅綠卡」是緣於十多年前在樂富分店看到有一家四口剩下的食物，根本足夠普通一家四口吃飽，指自己當晚都「唔係好瞓得着」，認為雖則做放題生意，但這樣浪費實在不夠環保，因此推出「紅綠卡」，只要吃完沒有浪費就可以下次消費獲減$10，而每派出1 張集團就會捐獻$5給環保團體，黃傑龍又說自此每年集團都有數十萬捐給不同的環保團體，而浪費亦明顯減少。

至於今次廣傳的大晒鬼食客，黃傑龍認為如果只是正常吃不下的份量，只是拿不到綠卡，並不會進行$20/克的罰款，不過，他亦表示多年前曾經和管理層討論「如果有客人實在係顯然過分不合理地浪費(類似今次呢個個案睇吓張相)，人神共憤！」，就十分支持員工專業地向客人收取罰款，提醒職員可以拍照及紀錄，又言明「絕對唔會最後錯嘅都係職員」，反而自己會向該位員工致敬。