日本核廢水掀超市搶鹽潮 鹽被掃光＋貨架空空如也！附食安中心回應

日本核廢水掀超市搶鹽潮！

最近日本決定排放福島核廢水，不少人擔心海洋環境及海洋生物會被輻射污染，同樣也憂心自己會否不小心進食到含輻射的水產！因此有人就再次誤信食鹽能防輻射一事，坊間多間超市更爆出「盲搶鹽」情況，有網民於Facebook群組傳上一張圖片，從相可見超市貨架空空如也，戰況激烈，相當誇張！

網民恥笑：真係食鹽多過你食米！

一眾網民都對大家瘋搶食鹽一事感到疑惑及不解，「之前咁多次盲搶都冇吸取經驗，真係冇得救」、「佢哋覺得要一次過買晒一家人下半生用嘅食鹽」、「搶來做咩？」。另有網民就恥笑其行為，「唔怪得啲老一輩成日話食鹽多過你食米」。

食安中心回應！

對於「食鹽抗輻射」傳聞，食安中心亦於社交平台就此作出回應闢謠：

有流言指食「碘鹽」可以抗輻射，搞到市民紛紛瘋搶含碘嘅食鹽。食安小隊要同大家澄清—— 食「碘鹽」唔可以抗輻射!!!

現時並無科學證據顯示進食鹽，能夠有效預防輻射對身體造成嘅損害。碘鹽嘅碘含量低，每日起碼要食大約2.5至5公斤，先相當於一粒碘片嘅劑量。相反，過量攝入碘及鈉（鹽）會危害身體健康。仲有，碘片唔係輻射「解毒劑」，亦唔能夠阻止身體吸收碘以外嘅放射性物質。