壽司郎員工即日辭職拒做人肉機器事主：份工唔係人做｜飲食熱話

Jun 7 2022

壽司郎員工即日辭職拒做人肉機器！近日有網民於「香港壽司刺身關注組」發文炮轟「壽司X做咗一日就無做」，力數公司對新入職員工無培訓、要在兩、三個鐘內記好所有製作方法及工作流程，新同事「做唔切做得慢比佢問候」之外，還受到「洗手考試」、「精神喊話」的壓迫，直斥「份工唔係人做」，並指「第一日返工就見到同我一齊返工的人食飯個陣執嘢走」，而他自已也即日劈炮辭職。帖文一出旋即惹來大批花生網友熱論，怒轟事主「返工洗手要洗15分鐘係好正統飲食業操守」、「大聲講確保溝通無誤」、「唔覺間公司要求好過分」，亦有同為飲食業工作的網民指「人工唔到位，又忙又要求高」、「好做嘅公司，邊有人走？」，正反兩方各有支持。

壽司郎員工即日辭職被日資公司職場文化嚇怕

有網民首日到壽司郎上班即被日資公司職場文化嚇怕，「不停講日文，去到公司門口要講…搵人睇住你洗手要講….洗完手做精神確認要講…第一日洗咗20分鐘手。」確實，有傳媒記者曾到壽司郎實習，員工每次洗手歷時3分鐘，由手指罅搓到手腕，期間要由同事監察，「仲要一路洗手一路叫一二一二三四五」，洗完手去換完制服再洗手，員工自然抱怨有如無限輪迴，不過網民質疑樓主個人衛生情況，「飲食業洗手好重要，因為洗手係確保食物中毒風險減低重要一環，而且做壽司係高風險食品，雖然所有嘢都好煩，但都代表間公司係好注重食物安全同SOP。」就連一向評論尖銳的的網友都稱讚該公司衛生要求高，加晒分，「睇完覺得客人可以安心食」。

有在壽司郎工作的員工發帖指「自己做咗一日就無做」，並力數份工「超級多嘢記、講嘢要叫她大聲、洗完手又要精神訓話。」第一日返工已見到好多人一齊「執嘢走」。（圖片來源：FB@香港壽司刺身關注組截圖）

壽司郎有網民指聽完樓主洗手論，即刻覺得呢間壽司店衛生要求高，食得好安心。 — 有網民指聽完樓主洗手論，即刻覺得呢間壽司店衛生要求高，食得好安心。（圖片來源：FB@香港壽司刺身關注組截圖）

打招呼全場要聽到朝朝精神喊話

壽司郎開朝會要進行「3分鐘確認」讀出「精神喊話」，帶客人入座時要求是全場都要聽到，「入去廚房要講….去樓面幫手要講…..每次講嘢佢都要你叫好大聲…唔夠材料要好大聲講出嚟，每30分鐘清潔清潔完要好大聲講『X號手握壽司完成清潔』」，樓主不禁抱怨：「邊講邊做….根本無停手」。有網民表示理解公司此舉是「大聲講確保溝通無誤」，不過也有網民指「講嘢大聲嗰下真，例如佢係企喺你張枱（遠離門口）隔離，或者係你行過嗰時，突然間好大聲咁同門口或者唔知邊度嘅客人講21314，呢種失驚無神真係好易嚇親人…」、「有時啲夥計講日文真係大聲到騷擾到客人，之前喺樂富嗰間真係嘈過茶樓。」確實，有時小編去食都會被員工叫聲嚇親！

壽司郎有網民讚同「日資公司最鍾意做精神確認」是很無聊。 — 有網民讚同「日資公司最鍾意做精神確認」是很無聊。（圖片來源：FB@香港壽司刺身關注組截圖）

壽司郎有持不同意見網民指公司對員工的工作有要求是無問題，反而樓主要考慮一下自已是否不適合工作。 — 有持不同意見網民指公司對員工的工作有要求是無問題，反而樓主要考慮一下自已是否不適合工作。（圖片來源：FB@香港壽司刺身關注組截圖）

壽司郎有網民則認為香港人員想享受日本服務質素，但換成要自已做到聊個標準就不了。 — 有網民則認為香港人員想享受日本服務質素，但換成要自已做到聊個標準就不了。（圖片來源：FB@香港壽司刺身關注組截圖）

新人未受夠培訓即上場一腳踢做錯即被鬧

作為第一日返工的新人，樓主指出在壽司郎返工「超級多嘢記，啲嘢點整點放，要你係2-3個鐘內記好，之後叫我個新手一個人做，做唔切、做得慢即比佢問候」、「店務員係1個人做3個人野（廚房，樓面，清潔）」，未受夠培訓即上場還要做得好，確實是強人所難，有前員工表示「食飯講就一個鐘，但係佢又要你換衫換鞋，搞呢樣搞嗰樣都無咗半個鐘，所以氣都未回夠求其放啲嘢落肚就繼續忙，總之佢對員工就真係刻薄咗啲。」亦有網民表示「壽司郎咁快放個新人自己做哂都好有問題」，難怪食物水準不穩定。同時有不少人對忙到無時停的店員表示同情，「麻煩真係尊重下係壽司郎返工嘅人….入面真係做到狗咁款」，眾所周知香港做飲食業工時長人工低，大家幫襯時不妨以禮相待，唔好再鬧店員嘞。