居日港人網紅預訂Omakase拍攝被拒 串嘴回覆留言區遭一面倒鬧爆：過主啦
居日港人YouTuber預訂餐廳拍片被拒
居日港人YouTuber「跳跳貓遊記」於周二（29日）在Threads上以「做YouTuber本身唔簡單， 但喺日本做YouTuber，更加難上加難。」為題發文訴苦，表示其團隊早前想發展新題材，介紹2025年最新米芝蓮推介的Omakase餐廳，為此已經揀選了一間性價比高的餐廳，打算預訂進食時段並拍片介紹，又稱「香港人一定會鐘意」。「跳跳貓遊記」續指，其團隊咗早已向該餐廳提出預訂要求，亦有主動向店家解釋來意，「會以普通客人身份用餐，只拍食物、氣氛與自己食嘢畫面，絕不拍攝其他客人，不影響店內運作」，然而隔日就收到對方拒絕預訂的回覆：
「雖然你哋話唔會拍到其他客人，但我哋嘅客人大多係重要商務客人， 因此拒絕你哋既預訂。」
「跳跳貓遊記」透露，餐廳亦有提出替代方案，稱如需拍攝可以「另約非營業時間，再正式申請」，而最後團隊只能放棄拍攝。他坦言，「有啲失望，但我理解」， 並解釋在日本當地雖然「場景感」好珍貴，但「隱私感」更為重要，「拍一條好片，唔止靠食物靚、畫面靚， 更多時要跨過好多睇唔到的『文化防線』」。
惡劣態度回覆留言
帖文一出隨即引起網民熱烈討論，有網民狠批「跳跳貓遊記」的想法歪曲，亦有網民狠批「跳跳貓遊記」想法自我中心。
狠批想法歪曲
有網民留言指出，團隊拍攝的要求沒有不當，而餐廳的做法也沒有問題，但「跳跳貓遊記」本人的想法就好有問題，批評「你覺得唔會影到其他客人、唔影響店內運作、俾足尊重，對方就一定要允許你拍攝，好有問題！呢啲同文化差異無關，餐廳單純為咗客人著想，唔想有任何可能影響到其他客人用餐體驗嘅行為存在。」不過「跳跳貓遊記」就馬上回覆「道德標準好高，連思想都要管制，勁過某國家政權」；而回覆亦引起另一位網民注意，留言「就算諗埋D歪理都冇問題 但係將自己D歪理公開出嚟仲企圖想人認同先係問題」，結果「跳跳貓遊記」又再態度傲慢地回覆「我有要求你認同？過主啦，對你無興趣」。
批評想法自我中心
另外有網民留言狠批：「篇文只係證明你唔認識日本，知道咗又唔喜歡日本人嘅文化。你話做youtuber艱難，咁人地日本做食嘅都好艱難。好多西客、好多留位唔出現、好多人俾個錢覺得自己大晒…… 嗱，唔好對號入坐，真係唔係話你俾錢大晒呀。唔接受人reject就貼出嚟。祝你d合作伙伴唔會離開你好了」，不過「跳跳貓遊記」就「串嘴 」回覆：「你好了解我？知我唔識日本？我唔識唔通你識？拜托唔好唔知扮知啦」、「X人之前做下research啦」，更晒出日本護照彰顯其「日本居民」身份，結果反被該名網民批評「自我感覺良好」。
「串嘴 」逐一回覆意見惹狠批
帖文中不少人留下善意的評論，但「跳跳貓遊記」繼續以狂妄的態度逐一回覆網民留言，例如「我有要求你睇？不請自來面皮真厚，過主啦」、「中文字好難理解？」、「妄想症好嚴重」、「要企係度俾你打？會唔會諗太多？紅唔紅都唔關你事，過主啦」、「Cheap得過你扮清高指責別人，其實係道德魔人」，結果其惡劣態度惹來網民猛烈批評。
不理解為何事主火冒三丈
有部份網民睇過帖文和留言區後，實在不理解為何「跳跳貓遊記」火冒三丈：「其實本來睇完你篇嘢都無乜嘢，但係好多留言無咩惡意你下下都 reply 到起晒槓係咩事…」、「建議你唔好做youtuber住，要練一練EQ先」、「句句都要駁，你都係唔好紅好啲，紅咗驚你死得不明不白」。
狠批事主的態度
另外，亦有不少網民「睇唔過眼」事主回覆留言區的態度：「又係啲撈唔起嘅爛X youtuber發窮惡吹X到咩文化防線」、「句句都要駁，你都係唔好紅好啲，紅咗驚你死得不明不白」、「其實你啲片都冇乜人睇就應該謙虛啲，有朝一日你有幾百萬followers你估人哋會唔俾你拍咩？人哋封晒成間舖俾你拍都得啦」、「用日文打再貼上去Twitter Ig TikTok 等人炎上呀麻咁理直氣壯，打中文同班你自稱睇唔起嘅人圍爐做乜？」、「做youtuber 做到咁搶口唔係話唔得，無公關囉」。
