帶9個月B搭飛機派耳塞！港夫婦「暖心舉動」竟遭網民鬧爆：唔使咁卑微

港夫婦帶9個月B搭國泰派耳塞糖果附雙語信求體諒

事主喺Threads分享，指自己日前乘搭國泰航空一班由香港飛往武漢嘅航班時，遇到一對超有心嘅父母。佢哋因為擔心9個月大嘅囝囝「小龍」第一次搭飛機可能會唔舒服而哭鬧，竟然預先為每位乘客準備咗一份小禮包，仲請空姐代為派發。禮包內有齊耳塞同糖果，更附上一張中英雙語字條，以BB口吻寫道：「我現在9個月了，這是我第一次搭飛機…可能會有點緊張、不舒服…屆時還希望各位見諒」。連該航班嘅空姐都留言證實，大讚BB父母「真的太暖心了」，因為佢哋連商務艙嘅客人都照顧到。

網民意見兩極鬧爆係病態風氣唔使搞到咁卑微

事件曝光後，隨即引發網民洗版式討論，意見更分成兩大陣營！有網民大讚父母貼心，認為「態度先擺出來，大家的容忍度相對也會提高」、「有呢個行為至少知道爸媽有作為」。不過，另一批網民就持相反意見，猛烈批評呢種做法係「病態風氣」，留言鬧爆：「拒絕推廣病態風氣」、「身為母親的我覺得不用把自己搞得那麼卑微」、「小孩本來就有權利搭飛機」。佢哋認為社會對育兒家庭越嚟越唔友善，父母根本唔需要為BB可能發出嘅聲音而道歉。

結局揭曉空姐證BB全程超乖巧暖心舉動惹人深思

喺網民為此爭論不休之際，該航班嘅空姐就現身「劇透」結局，大讚BB「小龍」喺飛行途中一直好乖，並無發生大家「預期」中嘅哭鬧情況。呢對父母嘅暖心舉動，本意係想換取大家嘅體諒，點知反而引爆一場關於「育兒尊嚴」同「社會包容」嘅論戰。究竟係家長過份憂慮，定係社會真係對BB太唔友善，搞到父母要做到咁盡？呢個舉動背後嘅原因，實在值得大家深思。